४० जलविद्युत् कम्पनीले झण्डै साढे १६ अर्ब रुपैयाँको आईपीओ ल्याउँदै  

काठमाडौँ । देशका विभिन्न क्षेत्रमा जलविद्युत् आयोजना (केन्द्र) सञ्चालन तथा निर्माण गरिरहेका ४० वटा जलविद्युत् कम्पनीले सर्वसाधारणका लागि साधारण शेयर (आईपीओ) निष्काशन गर्ने भएका छन् ।

ती कम्पनीहरू शेयर निष्काशनको आवश्यक प्रक्रियाका लागि नेपाल धितोपत्र बोर्ड (सेबोन) मा आवेदन दिएर स्वीकृतिको पर्खाइ (पाइपलाइन) मा रहेका छन् । स्वीकृतिको पर्खाइमा रहेका कम्पनीहरूमा २०८० मंसिर १९ देखि २०८१ मंसिर १४ गतेसम्म आवेदन दिएका छन् । सम्बन्धित कम्पनीहरूले १६ अर्ब रुपैयाँभन्दा बढीको शेयर निष्काशन गर्नका पालो कुरेर बसेका छन् ।

सेबानका अनुसार ४० कम्पनीहरूले १६ अर्ब ४१ करोड ३० लाख ७९ हजार ४ सय रुपैयाँ बराबरको सय रुपैयाँ अंकित दरका १६ करोड ३६ लाख ५ हजार ४ सय ६४ कित्ता प्राथमिक शेयर निष्काशन गर्नेछन् ।

आईपिओ निष्कासन गर्ने कम्पनीहरू मध्ये सबैभन्दा बढी सिउरी न्यादी पावर लिमिटेडले ३ अर्ब ३ करोड ६० लाख ७८ हजार ४०० रुपैयाँ बराबरको शेयर निष्काशन गर्ने भएको छ । कम्पनीले ३ करोड ३ लाख ६० हजार ७८४ कित्ता शेयर निष्कासन गर्न लागेको हो । उक्त कम्पनीको ४०.२७ मेगावाटको सुपर न्यादी हाइड्रोपावर प्रोजेक्ट निर्माणाधीन अवस्थामा छ ।

त्यस्तै, कालिन्चोक हाइड्रोपावर लिमिटेडले सबैभन्दा थोरै ७ करोड ५० लाख रुपैयाँको १०० अंकित दरका ७ लाख ५० हजार कित्ता शेयर निश्काशन गर्ने भएको छ । कम्पनीले दोलखाको बिगू र कालिन्चोक गाँउपालिकामा ५ मेगावाटको साङगु (सोरून) खोला हाइड्रो इलेक्ट्रिक प्रोजेक्ट निर्माण गरेको छ । 

सेबोन अध्यक्षविहीन भएपछि झण्डै एक वर्षदेखि आईओ निष्काशनको स्वीकृति रोकिँदा आवेदन दिएका जलविद्युत् क्षेत्रका कम्पनीहरूको सूची लामो भएको हो । शेयर निष्काशनको अनुमति नपाउँदा जलविद्युत् कम्पनीहरूले पुँजी लगानी वृद्धि गरी जलविद्युत् परियोजना विकासमा लगाउन नपाएको भन्दै निजी क्षेत्र तथा यसको छाता संस्था इपानका पदाधिकरीहरूले लामो समयदेखि गुनासो गर्दै आएका छन् ।

शेयर निष्काशन गर्ने कम्पनीहरूले देशका विभिन्न क्षेत्रमा ६८४.४१ मेगावाट बराबरका आयोजना निर्माण गरी सञ्चालनमा ल्याएका छन् भने कतिपय आयोजना निर्माणाधीन अवस्थामा रहेका छन् । राजनीतिक खिचातानीकै बीच झण्डै एक वर्षपछि सेबोन अध्यक्ष नियुक्त गर्न गत साता मात्रै सरकार सफल भएको थियो । अब भने सूचीमा रहेका कम्पनीहरूले प्राथमिक शेयर निष्काशनका लागि स्वीकृति पाउने अपेक्षा गरिएको छ ।

आईपीओ निष्काशनकर्ता कम्पनीको नाम, शेयर तथा प्रवर्द्धित आयोजनाहरूको सूची  

स्राेत : नेपाल धितोपत्र बोर्ड