माया खोला हाइड्रोको १९ लाख कित्ता सेयर आवेदन दिने आज अन्तिम दिन

काठमाडौं । सर्वसाधारणले माया खोला हाइड्रो पावर कम्पनी लिमिटेडको सेयर आवेदन दिन आज अन्तिम दिन हो । कम्पनीले माघ १३ गते (शुक्रबार) बाट खुल्ला गरेको सेयर आवेदन अवधि आज साझ ५ बजेबाट सकिन लागेको हो ।

प्रभावित स्थानीय र वैदेशिक रोजगारीमा गएका नेपाली नागरिकका लागि सेयर निष्कासन तथा बाँडफाँड गरी बाँकी रहेको १९ लाख ९२ हजार कित्ता सेयर सर्वसाधारणका लागि निष्कासन गरेको कम्पनीले जनाएको छ । कम्पनीका अनुसार प्रभावित स्थानीयका लागि जारी पुँजी १ अर्ब बराबरको ३४ प्रतिशत अर्थात ३४ करोड रकम बराबरको ३४ लाख कित्तामध्येको १० प्रतिशत हुन आउने अर्थात १० लाख कित्ता, वैदेशिक रोजगारीमा गएका नेपाली नागरिकका लागि १० प्रतिशत हुन आउने अर्थात २ लाख ४० हजार कित्ता, सामुहिक लगानी कोषका लागि ५ प्रतिशत हुन आउने अर्थात १ लाख २० हजार कित्ता र २ प्रतिशत हुन आउने अर्थात ४८ हजार कित्ता सेयर कम्पनीको कर्मचारीका लागि छुट्याएको हो ।  

सर्वसाधारणले न्यूनत्तम १० कित्तादेखि अधिकत्तम १ लाख कित्ता सम्म आवेदन दिन पाउनेछन् । कम्पनीको सेयर निष्कासन गरी बाँडफाँड गर्न प्रभु क्यापिटल लिमिटेडलाई बिक्री प्रबन्धक तोकिएको छ ।