४३ जलविद्युत् कम्पनीको साधारण सेयर निष्काशन रोकिँदा झन्डै २० अर्ब पुँजी सङ्कलन प्रभावित

काठमाडौँ । देशका विभिन्न क्षेत्रमा जलविद्युत् आयोजना निर्माण तथा सञ्चालन गरिरहेका ४३ वटा जलविद्युत् कम्पनीले सर्वसाधारणका लागि निष्काशन गर्ने साधारण सेयर (आइपिओ) रोकिएको छ । ती कम्पनीकाे प्रतिकित्ता १०० रुपैयाँ अ‌कित दरका कुल १९ करोड ३ लाख ६१ हजार ५ सय ९५ कित्ता प्राथमिक सेयर निष्काशन रोकिएको हो ।

साधारण सेयरको निष्काशन रोकिँदा जलविद्युत् आयोजनामा लगानी गर्न आवश्यक करिब १९ अर्ब ४४ करोड ३४ लाख २४ हजार ३ सय ३६ रूपैयाँ बराबरको पुँजी सङ्कलन हुन नसकेकाे निजी क्षेत्रले गुनासो गरेको छ । कम्पानीहरूले २०८० जेठ १९ गतेदेखि २०८१ चैत्र २७ गतेसम्म आइपिओ निष्काशन गर्न नेपाल धितोपत्र बोर्ड (सेबाेन) मा आवेदन दिएकाे जनाइएको छ ।

आइपिओ राेकिएका कम्पनीमध्ये सबैभन्दा बढी सिउरी न्यादी पावर लिमिटेडले ३ अर्ब ३ करोड ६० लाख ७८ हजार ४०० रुपैयाँ बराबरको ३ करोड ३ लाख ६० हजार ७८४ कित्ता सेयर निष्काशन गर्ने तयारी गरेको छ । कम्पनीले लमजुङमा ४०.२७ मेगावाटको सुपर न्यादी निर्माण गरिरहेको छ ।

यसैगरी,  कालिन्चोक हाइड्रोपावर लिमिटेडले सबैभन्दा थोरै ७ करोड ५० लाख रुपैयाँको १०० अङ्कित ७ लाख ५० हजार कित्ता सेयर निष्काशन गर्न आवेदन दिएको छ । उसले दोलखाको विगु र कालिन्चोक गाँउपालिकामा ५ मेगावाटको साङ्गु (सोरून) खोला निर्माणाधीन छ ।

सेयर निष्काशन गर्ने कमपनीहरूले देशका विभिन्न क्षेत्रमा ९२६.६६ मेगावाट बराबरका आयोजना निर्माण गरी सञ्चालनमा ल्याएका छन् भने कतिपय आयोजना निर्माणाधीन छन् । करिब १ वर्षसम्म सेबोनमा अध्यक्ष नियुक्त नहुँदा पनि धेरै कम्पनीको आइपिओ रोकिएको थियो । केही महिनाअघि मात्र सरकारले अध्यक्ष नियुक्त गरिसकेको भए पनि अझै सेयर निष्काशनको अनुमति प्राप्त हुन नसकेको प्रवर्द्धकहरूको गुनासो छ ।

आइपिओ निष्काशनकर्ता कम्पनीको नाम, सेयर तथा प्रवर्द्धित आयोजनाहरूको सूची

स्रोत : नेपाल धितोपत्र बोर्ड