ऊर्जा खबर
काठमाडौं । नेपाल विद्युत् प्राधिकरण हेटौंडा ग्रिड महाशाखा अन्तर्गत ४ वितरण केन्द्रबाट सञ्चालित ३ वटा सबस्टेसनबाट ३ दिन विद्युत् आपूर्ति कटौती हुने भएको छ । सबस्टेसनका विभिन्न उपकरणको मर्मत गर्नुपर्ने हुँदा आउने १६ गते (बिहीबार) देखि ३ दिन आपूर्ति बन्द हुनेछ ।
महाशाखाका अनुसार सिमरा, हेटौंडा, भरतपुर र वीरगन्ज वितरण केन्द्र अन्तर्गतका भरतपुर, हेटौंडा र परवानीपुर सबस्टेसनबाट विद्युत् आपूर्ति बन्द हुनेछ । यी सबस्टेसनका ११ केभी ब्रेकर, बसबार तथा अन्य आवश्यक मर्मत सम्भार गर्नुपर्ने हुँदा त्यहाँबाट प्रसारित ११ केभी फिडरहरू पूर्ण रूपमा अवरुद्ध हुनेछन् ।
भरतपुर सबस्टेसनअन्तर्गत १६ गते बिहान ६ बजेदेखि १२ बजेसम्म, हेटौंडा सबस्टेसनअन्तर्गत १९ गते बिहान ६ बजेदेखि १२ बजेसम्म र परवानीपुर सबस्टेसनअन्तर्गत २० गते बिहान ६ बजेदेखि १२ बजेसम्म विद्युत् आपूर्ति बन्द हुने भन्दै महाशाखाले जानकारी दिएको छ ।
