ऊर्जा खबर
काठमाडौं । नवलपरासीको परासी र सुनवल औद्योगिक क्षेत्रका उद्योगले बेहोर्दै आएको विद्युत् आपूर्तिको समस्या समाधान भएको छ । नेपाल विद्युत् प्राधिकरण परासी वितरण कन्द्रले गण्डक–परासी ३३ केभी डबल सर्किट र बुटवल–ज्यामिरे (सुनवल) ३३ केभी सिंगल सर्किट प्रसारण लाइन सञ्चालन गरेसँगै समस्या समाधान भएको हो ।
लाइन सञ्चालनमा आएसँगै परासी र सुनवल औद्योगिक क्षेत्रमा विद्युत् आपूर्तिको समस्या समाधान भएको केन्द्रका सहायक इन्जिनियर सन्जय प्रसाद गुप्ताले बताए । उनका अनुसार अब उद्योगले माग अनुसारको विद्युत पाउनेछन् ।
‘बुटवल–ज्यामिरे लाइनबाट पाल्पा सिमेन्ट र लक्ष्मी स्टिलमा विद्युत आपूति हुन्छ’, उनले ऊर्जा खबरसँग भने, ‘यसअघि ३३ केभी लाइनबाट ४ वटा उद्योगमा विद्युत सेवा आपूर्ति भइरहेको थियो, लाइन सञ्चालनमा आएसँगै नयाँ लाइनबाट २ उद्योगमा र पुरानो लाइनबाट २ उद्योगमा विद्युत आपुर्ति सुरु गरिएको छ ।’ १९ किलोमिटर सिंगल सर्किट प्रसारण लाइनको निर्माण दुई महिनाभित्रमा सम्पन्न गरी सञ्चालनमा ल्याइएको केन्द्रले जनाएको छ ।
सुनवल क्षेत्रमा लक्ष्मी स्टील्स्, पाल्पा सिमेन्ट, सर्वोत्तम सिमेन्टलगायतका उद्योगहरु सञ्चालित छन् । सुनवल क्षेत्रमा सञ्चालित उद्योगहरुलाई विद्युत् आपूर्तिका लागि १३२/३३ केभी सुनवल सबस्टेसन निर्माणाधीन छ । सबस्टेसनको निर्माण आगामी बैशाखभित्रमा सकिनेछ ।
प्राधिकरणले गण्डकमा रहेको १३२/३३ केभी सबस्टेसनबाट परासीसम्म २७ किलोमिटर ३३ केभी डबल सर्किट प्रसारण लाइन निर्माण गरेको हो । यो लाइनबाट परासीका औद्योगिक क्षेत्रमा विद्युत आपूर्ति हुन्छ ।
अब, गण्डक परासीमा रहेको पुरानो र अहिले निर्माण गरिएको दुईवटा सहित ३३ केभीका तीनवटा सर्किटबाट विद्युत् आपूर्ति दिन सकिने गुप्ताले बताए । उनका अनुसार यो लाइन ३ दिन अघि नै सञ्चालनमा ल्याइएको हो ।
प्राधिकरणले मुलुकमा उत्पादित विद्युत आन्तरिक रुपमै खपत बढाउन अल्पकालीन र दीर्घकालीन योजनासहित प्रसारण तथा वितरण प्रणालीको सुदृढीकरण तथा पूर्वाधार विस्तारलाई अभियानकै रुपमा चलाइरहेको छ । विद्युत् माग गरेका उद्योगहरुलाई प्रसारण तथा वितरण लाइनको सुदृढीकरण तथा क्षमता विस्तार गरी तत्काल विद्युत् दिने र निर्माणाधीन आयोजनाहरुको काम जतिसक्दो छिट्टो सम्पन्न गर्ने प्राधिकरणको अल्पकालीन योजना छ ।
