ऊर्जा खबर
काठमाडौं । देशभर चिसो बढेर विद्युत माग उकालो लागेपछि कुलेखानी जलाशय दैनिक २४ घन्टा चल्न थालेको छ । नेपाल विद्युत प्राधिकरणले विद्युतको माग र आपूर्ति व्यवस्थापन मिलाउन कुलेखानी जलाशय दिन रात चलाइरहेको हो ।
नदीको बहावमा आधारित जलविद्युतगृहको उत्पादन कम भएदेखि नै कुलेखानी जलाशयको पानी नियमितरूप उपयोग भइरहेको कुलेखानी–१ का इलेक्ट्रिसियन मनोज घिमिरेले बताए । उनका अनुसार बिहान र साँझ विद्युतको उच्च माग हुने समयमा कुलेखानी–१, कुलेखानी–२ र कुलेखानी–३ पूर्ण क्षमतामा चलिरहेका छन् ।
‘उच्च माग हुँदा कुलेखानी–१ ६० मेगावाट उत्पादन गरिरहेको छ,’ उनले ऊर्जा खबरसँग भने, ‘सोहीअनुसार २ र ३ पनि चल्छन् । माग कम हुँदै गएपछि आवश्यकता हेरेर कम क्षमतामा चलाउने गरिएको छ ।’ उनले जलाशय जलविद्युतगृह नियमित चल्न थालेपछि पानीको सहत घटेर १५२०.६४ मिटर पुगेको बताए ।
यो वर्ष पुरै भरिएको जलाशय सुख्खा याम सुरु यता १० मिटर घटिसकेको पनि उनले बताए । आन्तरिक विद्युत उत्पादन नबढुन्जेल कुलेखानी जलाशय दैनिकरूपमा चलिरहने उनले बताए ।
अहिले दिउँदोको समयमा कुलेखानी-१ ४५ मेगावाटमा चलिरहेको उनले जानकारी दिए । कुलेखानी–१ बाट छाेडिएकाे पानीअनुसार नै २, र ३ काे उत्पादन निर्भर हुने गर्दछ ।
जलाशयको पानी उपयोग गरी ६० मेगावाटको कुलेखानी–१ र ३२ मेगावाटको कुलेखानी–२ र १४ मेगावाटके कुलेखानी तेस्रे गरी ३ जलविद्युत केन्द्रबाट १ सय ६ मेगावाट विद्युत उत्पादन गरिन्छ । देशको विद्युत माग र आपूर्तिको सन्तुलन मिलाउने कुलेखानी एकमात्र जलाशय आयोजना हो ।
देशभर चिसो बढेसँगै विद्युतको माग १४ सय ६० मेगावाट मेगावाट पुगेको छ । राजधानीसहित चिसो बढी हुने जिल्लामा एसी, हिटरलगायत विद्युतीय उपकरणको उपयोग बढेपछि विद्युतको माग पनि बढिरहेको प्राधिकरण भार प्रेषण केन्द्रले जनाएकाे छ ।
काठमाडौं उपत्यकाको विद्युत माग ३ सय ७६ मेगावाटसम्म पुगेको छ । प्राधिकरणले आन्तरिक उत्पादन तथा अपुग विद्युत भारतबाट आयात गरेर माग व्यवस्थापन गरिरहेको छ । आन्तरिक उत्पादन कम हुँदै जाँदा भारतबाट हुने आयात ह्वात्तै बढेको छ । बर्खामा भारतबाट न्युनतम ५० मेगावाटसम्म मात्रै विद्युत आयात भएकामा अहिले करिब ६ सय ३२ मेगावाट हाराहारीमा आयात भइरहेको प्राधिकरणले जनाएको छ ।
