ऊर्जा खबर
काठमाडौं । लमजुङको दोर्दी गाउँपालिकाको वडा नम्बर ६ ढोडेनी भएर बग्ने दोर्दी खोलामा लिवर्टी इनर्जी कम्पनी लिमिटेडले निर्माण गरेको २५ मेगावाटको माथिल्लो दोर्दी ‘ए’ को निर्माण पूरा भएको छ ।
आयोजनाको सिभिल संरचना र उपकरण जडान लगायत सबै क्षेत्रकाे काम सकिएकाे साइड आयोजना प्रबन्धक सुरेश जाेशीले बताए । ‘हालै यस आयोजनाको सम्पूर्ण निर्माण कार्य सम्पन्न गरेका छौं’, उनले ऊर्जा खबरसँग भने, ‘अब एक साताभित्र बिजुली उत्पादन परीक्षण गर्ने तयारी भइरहेको छ ।’
‘नेपाल विद्युत प्राधिकरणको प्राविधिक टोली आएसँगै विजुली उत्पादन परीक्षण सुरु गरिनेछ’ उनले भने, । आयोजनाको दुई साताको बिजुली उत्पादन परीक्षण सफल भएमा व्यापारीक उत्पादन सुरू गरिनेछ । आयोजनाको विद्युत प्राधिकरणको किर्तिपुर सबस्टेसनमा जोडिनेछ ।
आयोजना निर्माणको काम यसअघिनै अन्तिम चरणमा पुर्याएपनि २०७८ असारमा आएको बाढीले ठुलो क्षति पुर्याउँदा प्रभावित भएको थियो । बाढीले पुर्याएको क्षतिको पुन निर्माणको काम सकिएको हो ।
आयोजनाबाट २०७६ चैतदेखि विद्युत उत्पादन सुरु गर्ने तालिका थियो । तर, प्रसारण लाइनको समस्या, विश्वव्यापी रुपमा फैलिएको कोरोना महामारी र बाढी पहिरोको कारण उत्पादन तालिका धकेलिदै आएको छ ।
यसअघि आयोजना सम्पन्न गर्न ४ अर्ब ६४ करोड ६१ लाख रुपैयाँ लागतमा सम्पन्न भएको थियो । बाढीले पुर्याएको क्षतिको पुन निर्माण गर्दा लागत बढेको छ । आयोजना सञ्चालनमा आएपछि वार्षिक १३ करोड ६७ लाख ८४ हजार ८ सय ६९ युनिट विद्युत उत्पादन हुनेछ ।
विद्युत उत्पादन सुरु भएको पहिलो वर्षमा करिब ८० करोड रुपैयाँ आम्दानी हुने प्रक्षेपण गरिएको छ । दोर्दी कोरिडोरमा माथिल्लो दोर्दी ‘ए’ सँगै ५४ मेगावाटको सुपर दोर्दी ‘ख’, १२ मेगावाटको दोर्दी–१ लगायत आयोजना निर्माणाधीन छन् । २७ मेगावाटको दोर्दी खोलाले भने उत्पादन परीक्षण सुरु गरेको छ ।
