सागर केसी
दोलखा । कोरोना भाइरसको दोस्रो लहर बढ्दै गएपछि ४५६ मेगावाटको माथिल्लो तामाकोसी जलविद्युत् आयोजना क्षेत्र भ्रमण तथा अवलोकनमा रोक लगाइएको छ । पछिल्लो समय कोरोना भाइरस बढ्दै गएको र आगन्तुकको चाप पनि बढ्न थालेपछि आयोजनासँग सम्बन्धित बाहेकका व्यक्तिहरूलाई रोक लगाएको हो ।
बाह्य व्यक्तिहरूको आवागमन बढ्दा आयोजनामा काम गर्ने कर्मचारी तथा मजदुरहरू असुरक्षित हुने कारणले भ्रमणमा रोक लगाइएको आयोजनाका प्रशासन प्रमुख मित्रमणि पोखरेलले जानकारी दिए । ‘निर्माण अन्तिम चरणमा रहेको र भित्रका कोही व्यक्तिमा संक्रमण भएमा काम रोकिन सक्ने अवस्थालाई मध्येनजर गर्दै भ्रमणमा रोक लगाइएको छ,’ उनले भने ।
पोखरेलका अनुसार आयोजनाबाट बाहिर जाने र भित्रिने कर्मचारीहरूका लागि समेत पिसिआर अनिवार्य गरिएको छ । पिसिआर अनिवार्य गरेपछि अति आवश्यक कामबाहेक आयोजनास्थल छाड्ने र आउने कर्मचारीहरू घटेका छन् । आयोजनाको बैशाख मसान्त भित्र विद्युत उत्पादन गर्ने गरी सुरुङको सरसफाइ, पेनस्टक पाइप जडानको अन्तिम काम जारी छ ।
आयोजनाले सुरुङमा पानी हालेर परीक्षण गर्नका लागि बिहीबारबाट बाँधमा पानी भर्ने तयारी गरेको छ । बुधबारबाट पानी भर्ने योजना भए पनि तयारी पूरा नभएकाले बुधबार नदी थुनिएन । बाँध र डिस्याण्डरमा पानी भरिएपछि सुरुङमा पानी हालेर सुरुङ र पेनस्टक पाइपको परीक्षण गर्ने आयोजनाको तयारी छ ।
