सम्झना घिसिङ
रसुवा। बागमती प्रदेश अन्तर्गत रसुवा जिल्लाकाे सान्जेन खोलामा १३५ मेगावाट भन्दा बढी क्षमताका जलविद्युत आयोजना निर्माण भइरहेका छन् । सान्जेन जलविद्युत कम्पनी लिमिटेड र सला सुंगी प्रालि मार्फत ती आयोजना निर्माण भइरहेका हुन् ।
निर्माणाधीनमध्ये सान्जेन जलविद्युत कम्पनी अन्तर्गत दुई (४२.५ मेगावाटको सान्जेन र १४.८ मेगावाटको माथिल्लाे सान्जेन) र सला सुंगी मार्फत एउटा (७८ मेगावाटकाे सान्जेन खाेला) आयाेजना निर्माण भइरहेका छन् ।
उल्लिखित आयाेजनाहरूमध्ये सान्जेन र माथिल्लाे सान्जेनकाे निर्माण अन्तिम चरणमा पुगेकाे छ । ९९ प्रतिशत निर्माण पूरा भएकाे माथिल्लाे सान्जेनबाट यही चैतभित्र र ९६ प्रतिशत निर्माण पूरा भएकाे सान्जेनबाट २०८० असारभित्र विद्युत उत्पादन हुने कम्पनीले जानकारी दिएकाे छ ।
माथिल्लो सान्जेनकाे २०६९ भदौ ७ गते उत्पादन अनुमतिपत्र लिई निर्माण प्रक्रिया अघि बढाइएको थियो । यस्तै, २०६८ मंसिर १२ गते उत्पादन अनुमति पाएकाे सान्जेनकाे इलेक्ट्रो मेकानिल, हाइड्रो मेकानिकल उपकरण जडानलगायतका काम भइरहेकाे छ । कुनै अवरोध नभए निर्धारित तालिकाभित्रै विद्युत उत्पादन गरिने कम्पनीले जनाएकाे छ ।
दुवै आयाेजनाबाट यसअघि नै विद्युत उत्पादन गर्ने तालिका थियो । तर, विश्वव्यापी रुपमा फैलिएको कोरोना भाइरसले गर्दा चिनियाँ भन्सार नाकाबाट उपकरण आयातमा अवरोध भई आयात ढिला हुँदा उत्पादन प्रभावित भएकाे हाे । दुवै आयोजनाका इलेक्ट्रो मेकानिकल उपकरणहरूको उत्पादन, जडान, परीक्षण सञ्चालनको ठेक्का पाएको कम्पनीका प्राविधिकहरू पनि चीनबाट नेपाल आउन नसक्दा करिब २ वर्ष काम प्रभावित भएकाे थियो ।
यी दुवै आयाेजनाबाट उत्पादित विद्युत नेपाल विद्युत प्राधिकरणको चिलिमे हब सबस्टेसनमा जोडिनेछ । सबस्टेसनसम्मको आवश्यक ५.९ किलोमिटर लामो प्रसारण लाइनको काम पूरा भएको छ ।
सान्जेन ५ अर्ब २ करोड ४२ लाख र माथिल्लो सान्जेन २ अर्ब २१ करोड ८० लाख रुपैयाँमा पूरा गर्ने लक्ष्य रहेकाे छ । तर, निर्माण प्रक्रियामा भएकाे ढिलाइ, डलरको मूल्यवृद्धि र मुद्रास्फूर्ति लगायत कारणले गर्दा आयोजनाको लागत बढ्न सक्ने कम्पनीले अनुमान छ ।
यस्तै, सान्जेन खाेलामा पहिचान भएकाे सबै भन्दा ठुलो ७८ मेगावाटको सान्जेन खोला पनि निर्माणाधीन छ । कम्पनीले याे आयोजनाकाे उत्पादन अनुमतिपत्र २०७३ असार ९ गते लिई निर्माण प्रक्रिया अघि बढाइएको हाे ।
