ऊर्जा खबर
काठमाडौँ । सिन्धुपाल्चोकमा ३.५६ मेगावाटको देवढुङ्गा चाकुखोला आंशिक जलाशययुक्त जलविद्युत् आयोजना निर्माण हुने भएको छ । देवढुङ्गा मालिका हाइड्रो पावर कम्पनी प्रालिले उक्त आयोजना निर्माण गर्नेगरी अघि बढाएको हो । यसका लागि अनुमति पत्रको माग गर्दै कम्पनीले आवेदन दिएको विद्युत् विकास विभागले बुधबार सूचना प्रकाशित गरेर जानकारी गराएको छ ।
जिल्लाको भोटेकोसी गाउँपालिका वडा नम्बर ४ र ५ मा अवस्थित देवढुङ्गा र चाकुखोला समेतको पानीलाई प्रयोग गरेर आयोजना निर्माण गरिने भएको हो । आयोजनाको प्रारम्भिक वातावरणीय परीक्षण (आईईई) प्रतिवेदन तयार भइसकेको छ । प्रतिवेदन अनुसार दुई खोलामा बाँध बाँधेर पानी लगि विद्युत् उत्पादन गरिने छ । आयोजनाको देवढुङ्गा खोला हेडवर्क्स , हेडरेस पाइप, इन्लेट जस्ता संरचना भोटेकोशी गाउँपालिकाको वडा नम्बर ४ सिन्धुपाल्चोकमा रहने छ ।
त्यस्तै आयोजनाको चाकुखोला हेडवर्क्स, हेडरेस पाइप, हेडपोण्ड, पेनस्टक पाइप, विद्युत् गृह र टेलरेस भोटेकोशी गाउँपालिकाको ५ नम्बर वडामा निर्माण गर्ने गरी प्रस्ताव गरिएको छ ।
आयोजनाबाट वार्षिक १९.८२ गिगावाट आवर विजुली उत्पादन हुने छ । आयोजनाको बिजुली ३३ केभीको ८ किलोमिटर लामो प्रसारण लाइनमार्फत बाह्रबीसे सबस्टेशनमा जोडिने छ । आयोजनाबाट २०८५ सम्ममा विद्युत् उत्पादन गर्ने लक्ष्य राखिएको छ ।
यस आयोजनाबाट कुनै उल्लेखनीय वातावरणीय प्रभाव पर्ने देखिए प्रथमपटक सूचना प्रकाशित भएको मितिले ३५ दिनभित्र विद्युत् विकास विभाग वा कम्पनीसमक्ष लिखित रायसूझाव पेश गर्न कम्पनीले सरोकारवाला सबैमा आह्वान गरेको छ ।
