४ वर्षसम्म पनि पूरा भएन १ मेगावाटको चुकेनी खोला

काठमाडौँ । जुम्लाको पातारासी गाउँपालिका–१ मा निर्माण सुरु भएको ४ वर्ष वितिसक्दा पनि १ मेगावाटको चुकेनी खोला जलविद्युत् आयोजनाको काम सम्पन्न भएको छैन् । १८ महिनामा सम्पन्न गर्नेगरी निर्माण सुरु गरिएको आयोजना अहिलेसम्म सञ्चालनमा आउन सकेको छैन् ।

९९८ किलोवाटको आयोजनाको काम ९० प्रतिशत पूरा भएको छ । २०७६ जेठदेखि सुरु भएको आयोजनाले गति लिन नसकेको जनाइएको हो । सम्झौताअनुसार आयोजनाको काम निर्माण सुरु भएको मितिबाट १८ महिना भित्रै सम्पन्न गर्नुपर्ने भएपनि म्याद थप गर्दै निर्माण गर्दा आयोजनाले अपेक्षित गति लिन नसकेको पातारासी गाउँपालिका उपाध्यक्ष जनमाया रोकायाले जानकारी दिए ।

आयोजनाको अझै १० प्रतिशत काम बाँकी छ । निर्माण कम्पनीको ढिलासुस्तीले आयोजनाको प्रगति हुन सकेको छैन । कम्पनीका प्रतिनिधि श्रीराम परासरले आयोजनाको १० प्रतिशत काम भारतबाट आउने प्राविधिकबाट हुने जानकारी दिए । आगामी बैशाखसम्म बत्ती बाल्ने गरी काम गरिने निर्माण कम्पनीले जनाएको छ । आयोजनाको कुल लागत ४३ करोड रूपैयाँ रहेको छ । यसमा ३० करोड रूपैयाँ वैकल्पिक ऊर्जा प्रवद्र्धन केन्द्र र १३ करोड रूपैयाँ पालिका र स्थानीय जनताको लगानी छ ।

जनताले चुकेनीखोलामा सहकारी संस्थामार्फत आफ्नो घरजग्गा धनपुर्जा धरौटी राखेर ६ करोड रुपैयाँ बराबरको सेयर लगानी गरेका छन् । नागरिकले बैंकको ब्याज तिरिरहेका छन्, तर बत्ती बाल्न अझै पाएका छैनन् ।
आयोजनाको काम दुई प्रतिशतमात्रै बाँकी भनेको महिनौँ बित्दा पनि बत्ती नबलेपछि पातारासी गाउँपालिका अध्यक्ष पूर्णसिंह बोहोरा नेतृत्वको टोलीले आयोजनाको अनुगमनसमेत गरेको छ । बत्ती आउने प्रतीक्षा गरिरहेको बेला अझै १० प्रतिशत काम बाँकी रहनु कम्पनीको लापरवाही भएको गाउँपालिका अध्यक्ष बोहोराले बताए ।

जलविद्युत् आयोजना निर्माणको ठेक्का पाएको फेवा कन्स्ट्रक्सन प्रालिका प्रबन्धक चन्द्र भण्डारीले सुरुको दुई वर्ष कोभिडका कारण काम रोकिएपछि ढिला भएको जानकारी दिए । उनले चाँडै बत्ती बाल्ने गरी काम अन्तिम चरणमा पुगेको जानकारी दिए । आयोजनाबाट३ हजार ४५३ घरपरिवार लाभान्वित हुनेछन् । राष्ट्रिय प्रसारण लाइनमा विद्युत् जडान गर्ने योजना रहेको नेपाल विद्युत् प्राधिकरण जुम्ला वितरण केन्द्रले जनाएको छ ।