ऊर्जा खबर
काठमाडौं । रामेछापस्थित ३० मेगावाटको लिखु ‘ए’ जलविद्युत आयोजना विद्युत उत्पादनका लागि तयार भएको छ । एमभी दुगड समूहको सहायक कम्पनी नुम्बर हिमालयन हाइड्रो पावर प्रालि प्रवद्र्धक रहेको आयोजनाको संरचना निर्माण पूरा भई विद्युत उत्पादनका लागि तयार भएको हो ।
आयोजनाको बाँध, सुरुङ, विद्युतगृह तथा स्वीचयार्ड लगायत सबै संरचनाको काम सम्पन्न भइसकेको प्रवद्र्धक मोतिलाल दुगडले बताए । उनका अनुसार संरचनाको काम सम्पन्न भई आयोजना विद्युत उत्पादनका लागि तयार भए पनि आफैंले बनाउनु पर्ने प्रसारण लाइनको काम बाँकी रहेकाले प्रणालीमा जोड्न सकिएको छैन ।
‘हाम्रो आयोजना विद्युत उत्पादनका लागि तयारी अवस्थामा छ,’ उनले ऊर्जा खबरसँग भने, ‘तर, हामीले नै २२० केभी न्यू खिम्ती सबस्टेसनसम्म निर्माण गर्नुपर्ने १३२ केभी डबल सर्किट प्रसारण लाइनको काम सकिएको छैन । यो काम सम्पन्न गर्न अब बढीमा २ महिना लाग्ने देखिन्छ ।’
उनले निर्माणाधीन ४० किलोमिटर लामो प्रसारण लाइन पूरा भई सञ्चालनमा आएपछि मात्रै लिखु ‘ए’बाट विद्युत उत्पादन सुरु गर्न सकिने बताए । लिखु–१ देखि न्यू खिम्ती सबस्टेसनसम्म प्रसारण लाइनका ७५ वटा टावर निर्माण भइरहेका छन् ।
प्रसारण लाइनको काम अहिलेसम्ममा सम्पन्न भइसक्नु पर्ने भए पनि कोरोना (कोभिड–१९) महामारी र बर्खाका कारण समय लागेको उनले बताए । दुगड समूहले नै लिखु खोलामा अन्य २ जलविद्युत आयोजना पनि निर्माण गरिरहेको छ ।
निर्माणाधीन २ आयोजनाको जडित क्षमता १३० मेगावाट छ । ७७ मेगावाटको लिखु–१ र ५२ मेगावाटको लिखु–२ आयोजना निर्माण भइरहेका छन् । लिखु–१ को ७५ प्रतिशत र लिखु–२ को ८० प्रतिशत बढी निर्माण सम्पन्न भइसकेको दुगडले जानकारी दिए ।
निर्माणाधीन यी आयोजनाको काममा पनि कोरोना (कोभिड–१९) महामारीको प्रभाव परेको छ । दुगड समूहले एकै पटक वित्तीय व्यवस्थापन गरी १६० मेगावाटका ३ जलविद्युत आयोजनाको निर्माण सुरु गरेको थियो । दुगड समूहले यी ३ आयोजनामा ३२ अर्ब रुपैयाँ लगानी गरेको छ ।
