ऊर्जा खबर
काठमाडौं । हव पावर प्रा.लि ले १२.६० मेगावाटको तल्लो न्यादी जलविद्युत आयोजना निर्माण गर्ने भएको छ । कम्पनीले लमजुङ जिल्लाको मर्स्याङ्दी गाउँपालिकाको वडा नम्बर ६ र ७ मा पहिचान भएको आयोजना अघि बढाउन लागेको हो ।
आयोजनाको अध्ययन पूरा भएकोले उत्पादन अनुमतिपत्र लिने प्रक्रिया अन्तिम चरणमा पुगेको कम्पनीले जनाएको छ । यही क्रममा विद्युत विकास विभागले कम्पनीलाई उत्पादन अनुमतिपत्र दिने तयारी गरिरहेको छ ।
विभागले अनुमतिपत्र जारी गर्नुअघि सूचना प्रकाशन गरेर आयोजना निर्माण तथा सञ्चालन गर्दा पर्न सक्ने प्रतिकुल असरका बारेमा सम्बन्धित सरोकारवालासँग राय/सुझाव मागेको छ । सूचना जारी भएको मितिले ३५ दिनभित्र प्राप्त हुने गरी राय/सुझाव पठाउन सरोकारवाला समक्ष आग्रह गरेको छ ।
आयोजनाको मुख्य सूचनाहरू खोलाको बायाँ किनारमा रहनेगरी डिजाइन तयार पारिएको कम्पनीले जनाएको छ । आयोजनाको हेडवक्र्स मर्स्याङ्दी गाउँपालिकाकोे वडा नम्बर ६ र ७ मा पर्दछ ।
पानीलाई १८३६.५० मिटर लामो हेडरेस सुरुङ र ४१९ मिटर लामो पेनस्टक पाइपमार्फत सतही विद्युतगृहमा पुर्याइनेछ । विद्युतगृहमा जडित ३ वटा टवाईनसँग जोडिएको जेनेरेटरमार्फत विद्युत उत्पादन गरिने कम्पनीले जनाएको छ ।
आयोजनाबाट निर्माण सुरु गरेको ३ वर्षमा उत्पादन सुरु गर्ने लक्ष्य कम्पनीको छ । आयोजना पूरा भएपछि वार्षिक ७७.६६८ गिगावाट घन्टा विद्युत उत्पादन हुनेछ । उत्पादीत विद्युत १३२ केभी लाइनमार्फत ४ किलोमिटर दुरीमा रहेको नेपाल विद्युत प्राधिकरणको टाडीकुना हब सबस्टेसनमा जोडिनेछ ।
