३६ मेगावाटको माथिल्लो बलेफी ‘ए’ भोलिदेखि प्रणालीमा जोडिने

काठमाडौं । सिन्धुपाल्चोकमा बलेफी हाइड्रो पावर कम्पनीले निर्माण सम्पन्न गरेको ३६ मेगावाटको माथिल्लो बलेफी ‘ए’ भोलि (कात्तिक ७ गते) देखि राष्ट्रिय प्रणालीमा जोडिन लागेको छ । यो यस जिल्लामा निर्मित सबैभन्दा ठूलो आयोजना हो, जुन निजी क्षेत्रले सम्पन्न गरेको छ ।

अन्तिम चरणको प्रसारण लाइन र ट्रान्सफर्मरको परीक्षण भइरहेको आयोजनाको विद्युत प्रणालीमा जोड्ने तयारी भइरहेको कम्पनीका अध्यक्ष उमेशकुमार कसजुले बताए । ‘आयोजनाको सबै संरचनामा पानी भरेर परीक्षण गर्ने कार्य सफल भएपछि उत्पादन परीक्षणको तयारी गरिरहेका छौ’, उनले ऊर्जा खबरसँग भने, ‘भोलीदेखि विद्युत उत्पादन परीक्षण सुरु हुन्छ ।’

आयोजनाबाट दुई सातासम्म परीक्षण उत्पादन गरेर नेपाल विद्युत प्राधिकरणलाई दिएपछि व्यावसायीक उत्पादन सुरु हुनेछ । उत्पादन हुने विद्युत विद्युतगृहदेखि २२ किलोमिटर दुरीमा रहेको लामोसाँघु सबस्टेसनमा जोडिनेछ । आयोजनाको विद्युतगृहमा १२ मेगावाट क्षमताका ३ वटा उत्पादन युनिट छन् । 

आयोजनाको विद्युत यसअघि नै प्रसारण प्रणालीमा जोड्ने योजना अनुसार काम गरिरहेकोमा असारमा सिन्धुपाल्चोकमा आएको बाढी र पहिरोको अवरोधले उत्पादन लम्बिएको हो ।

यसअघि आयोजनाबाट २०७८ साल जेठदेखि नै विद्युत उत्पादन गर्ने लक्ष्य थियो । यही समयमा कोरोना (कोभिड–१९) महामारीको दोस्रो लहरको समयमा  लगाइएको निशेधाज्ञाका कारण निर्माण सामाग्री तथा उपकरण ढुवानीमा भएको समस्या एवं केही कामदार र कर्मचारी कोरोना संक्रमित भएपछि निर्माण प्रभावित हुँदा तालिका सारिएको थियो ।

यो आयोजना सम्पन्न हुँदा ७ अर्ब रुपैयाँ खर्च हुने अनुमान छ । आयोजनामा ३० प्रतिशत ऋण र ७० प्रतिशत स्वपुँजी लगानी छ । आयोजनामा ५ बैंकले ऋण लगानी गरेका छन् ।