ऊर्जा खबर
काठमाडौँ । ४०.२७ मेगावाटको सुपर न्यादी जलविद्युत् आयोजनाको हेडरेस र टेलरेस सुरुङ तथा भूमिगत विद्युत्गृह खन्ने कार्य सम्पन्न भएको छ । आयोजनाको हेडरेस सुरुङको लम्बाई ७ हजार ६४५ मिटर रहेको छ ।
सिउरी न्यादी पावर लिमिटेडले आयोजनाको प्रवर्द्धन गरेको हो । एक कार्यक्रमका बीच कम्पनीका प्रबन्ध निर्देशक दिनेश गुरुङ, नेपाली सेनाका गुल्मपती चित्रकुमार कार्की र आरके हाइड्रोपावर एन्ड एसोसिएट्सका प्रबन्ध निर्देशक राजकुमार (आरके) पण्डितले संयुक्तरूपमा स्वीच अन गरी सुरुङको ब्रेकथ्रु गरे ।
पेनस्टक जडान र विद्युत् गृहको काम अन्तिम चरणमा पुगेको छ । जी एण्ड जी इन्फ्र प्राइभेट लिमिटेडले निर्माण गरिरहेको उक्त आयोजनामा एनएमबी बैंकको अगुवाइमा ६ वटा वित्तीय संस्थाले ५ अर्ब २५ करोड रूपैयाँ ऋण लगानी गरेका छन् । प्रवर्द्धकको स्वपुँजी १ अर्ब ७५ करोड रूपैयाँ रहने छ । उक्त बैंक एवं वित्तीय संस्थाको ७५ प्रतिशत र प्रवर्द्धकको २५ प्रतिशत रहने आयोजनाले जनाएको छ ।
करिब ७ अर्ब रूपैयाँ लागतमा निर्माण कार्य सम्पन्न गर्ने आयोजनाको लक्ष्य छ । समयमै सम्पन्न गर्ने लक्ष्यका साथ काम भइरहेको आयोजना प्रबन्ध निर्देशक गुरुङले बताए ।
आयोजनाबाट उत्पादन हुने विद्युत्लाई विद्युत् गृहदेखि ११ किलोमिटर टाढाको टारीकुनामा निर्माण गरिने १३२ केभी प्रसारण लाइन खुदी सबस्टेसनमा जोडिने भएको छ । सबस्टेसनसम्मको प्रसारण लाइनमध्ये करिब ६ किलोमिटर आयोजनाले नै निर्माण गर्ने भएको छ । आयोजनाका अनुसार वर्षातको ६ महिना प्रतियुनिट ४.८० रुपैयाँ र ६ महिनाको हिउँदयाममा ८.४० पैसाको दरले विद्युत् खरिदबिक्री गर्ने भएको छ ।
आगामी २०८२ असार महिनासम्ममा आयोजनाको काम सक्ने गरी अघि बढेको आयोजनाको कुल ८० प्रतिशत निर्माण कार्य सकिएको छ ।
