ऊर्जा खबर
काठमाडौं । जलविद्युत तथा सौर्य ऊर्जा विकासमा एकपछि अर्को सफलता हासिल गर्दै आएको अपि पावर कम्पनी लिमिटेड अब हरित हाइड्रोजन तथा एमोनिया उत्पादनतर्फ पनि अग्रसर भएको छ । यसका लागि कम्पनीले आज (साउन १ गते) भारतको ग्रिन्जो इनर्जी प्रालिसँग समझदारीपत्र (एमओयू) मा हस्ताक्षर गर्न लागेको छ ।
सुरमा देशका विभिन्न ठाउँमा ५० मेगावाट बराबरको जलविद्युत खपत हुने गरी हरित हाइड्रोजन तथा एमोनिया प्लान्ट स्थापना गरिने कम्पनीका प्रबन्ध निर्देशक सञ्जिव न्यौपानेले बताए । उनका अनुसार यसअघि निर्माण भई सञ्चालनमा आइसकेका जलविद्युतगृहबाट निस्कने पानी उपयोग गरी हाइड्रोजन प्लान्ट स्थापना हुनेछ ।
‘अहिले दार्चुलामा निर्मित ८.५ मेगावाटको नौगड गाड जलविद्युत्गृहको टेलरेसबाट निस्कने पानी उपयोग गरी १ मेगावाट विद्युत खपत गर्ने प्लान्ट स्थापना हुनेछ,’ उनले भने, ‘सन् २०२५ सम्म ५० मेगावाटसम्म विद्युत खपत गर्ने गरी प्लान्ट विकास गर्ने लक्ष्य छ ।’ लक्षित क्षमता बराबर विद्युत खपत गर्ने प्लान्ट राख्न १ अर्ब रुपैयाँ लागत अनुमान गरिएको छ ।
उक्त क्षमताको प्लान्ट राख्दा वार्षिक ४००० मेट्रिक टन हरित हाइड्रोजन उत्पादन गर्न सकिने न्यौपानेको भनाइ छ । अपि पावरले अहिलेसम्म १६.५ मेगावाट जलविद्युत तथा ६ मेगावाट सौर्य ऊर्जा उत्पादन गरिसकेको छ । कम्पनीले दार्चुलामै निर्माण गरिरहेको ४० मेगावाटको माथिल्लो चमेलिया काम करिब ७० प्रतिशत पूरा भइसकेको छ ।
.jpg)
