म्याग्दी र राहुघाटका आयोजनाको विद्युत जोडिने प्रसारण लाइनको काम साढे २ वर्षमा पूरा हुने

काठमाडौं । नेपाल विद्युत प्राधिकरणले म्याग्दी र राहुघाट नदीमा निर्माणाधीन तथा निर्माणका क्रममा रहेका जलविद्युत आयोजनाबाट उत्पादन हुने विद्युतलाई राष्ट्रिय प्रणालीमा जोड्न प्रसारण लाइन र सवस्टेसनको निर्माण सुरु गरेको छ । प्राधिकरणले मालिका गाउँपालिका–७ विमदेखि रघुगंगा–३ राहुघाटको अम्वाङ जोड्ने १३२ केभी क्षमताको प्रसारण लाइन र सबस्टेसनको काम सुरु गरेको हो ।

दुवै ठाउँमा जग्गा व्यवस्थापनको काम सकेर सवस्टेसनका उपकरण राख्ने ठाउँ बनाउन सुरु भएको र प्रसारण लाइनका टावर रहने ठाउँको जग्गा अधिग्रहण प्रक्रिया थालिएको आयोजना प्रमुख रोशन अग्रवालले बताए ।

सन् २०२१ को डिसेम्बर ३१ मा भारतीय कम्पनी लार्सन एण्ड टियुब्रो (एलएनटी) सँग २६ मिलियन अमेरिकी डलरमा सवस्टेसन र प्रसारण लाइन निर्माणका लागि ठेक्का सम्झौता भएको थियो । आयोजनाको ठेक्का अवधि ३० महिनाको छ ।

ठेकेदार कम्पनीले स्थलगत सर्वेक्षण र जग्गा व्यवस्थापनको काम सकेर पूर्वाधार निर्माणलाई तीव्रता दिएको जनाएको छ । २५ किलोमिटर दूरीको डबल सर्किट प्रसारण लाइनमा ७७ वटा टावर निर्माण हुनेछन् । टावर निर्माण हुने जग्गाको पहिचान र नापजाँच तथा अधिग्रहणका लागि मुआब्जा वितरणको काम भइरहेको छ ।

रघुगंगा–३, बेनी नगरको–९ र १०, मंगला–१, मालिकाको वडा नम्बर ६ र ७ मा प्रसारणलाइनको टावर निर्माण हुनेछन् । डाँडाखेत सवस्टेसनमा १३३/३३ केभी, ३० एमभीए क्षमता र एआइएस प्रविधिको उपकरण जडान गरिने भएको छ ।

२२०/१३/३३ केभी, २०० एमभीए क्षमताको उपकरण जडान हुने राहुघाट सवस्टेसन जीआइएस प्रविधिको हुने अग्रवालले बताए । एसियाली विकास बैंकको ऋणमा प्रसारण लाइन र सवस्टेसन निर्माण गर्न लागिएको हो । डाँडाखेतमा सवस्टेसन बनाउन पाँच वर्षअघि ५१ रोपनी र राहुघाटको अम्बाङमा करिब ९० रोपनी जग्गा अधिग्रहण गरेर प्रारम्भिक चरणको पूर्वाधार निर्माण भएको छ ।

दुवै ठाउँमा जग्गा व्यवस्थापन, घेराबारा, पहुँचमार्गका साथै डाँडाखेतमा गार्ड र कर्मचारी आवासगृह भवनसमेत निर्माण भएको छ । म्याग्दी नदीमा १७२.८ मेगावाट क्षमताको चार वटा जलविद्युत् आयोजना निर्माण सुरु भएका छन् ।

संसारको सातौं अग्लो शिखर धौलागिरि हिमालको फेदीबाट बग्ने म्याग्दी नदीमा दुई वटा आयोजनाले पूर्वाधार निर्माण सुरु गरेका छन् । थप दुई वटा आयोजनाले लगानी जुटाएर पूर्वाधार निर्माणको तयारी गरेका छन् ।

राहुघाटमा ३५.५ मेगावाटको राहुघाट मंगले र ४८.५ मेगावाट क्षमताको अपर राहुघाट, २१.३ मेगावाट क्षमताको ठूलोखोला र ४० मेगावाट क्षमताको राहुघाट जलविद्यत आयोजना निर्माणाधीन छन्् । ५.५ मेगावाट क्षमताको बगरखोला, ४.७५ मेगावाटको स्यानोखोला, ४.९० मेगावाटको अपर ठूलोखोला र १५ मेगावाटको माथिल्लो ठूलोखोला जलविद्युत आयोजना निर्माणको चरणमा छन् ।