ऊर्जा खबर
काठमाडौं । विश्वव्यापी रूपमा फैलिएको कोरोना महामारी (कोभिड–१९) रोकथाम गर्न सरकारले देशघर निशेधाज्ञा घोषणा गरेको छ । यस्तो समयमा पनि जलविद्युत् र सोलार आयोजना अध्ययन तथा निर्माणका गतिविधि भने रोकिएका छैनन् । गत बैशाख १५ गतेदेखि यता ९२ मेगावाटका आयोजनाले उत्पादन अनुमतिपत्र लिन विद्युत् विकास विभागमा आवेदन दिएका छन् ।
विभागका अनुसार अहिलेसम्म ४ प्रवद्र्धकले निर्माण अनुमतिका लागि आवेदन दिएका छन् । जसमा अध्ययन पूरा भएको १० मेगावाटको सोलार ८२.६ मेगावाटका ३ जलविद्युत् आयोजना छन् । सबैभन्दा ठूलो आवेदक ३७.७ मेगावाटको इसुवा खोला क्यासकेड निर्माण गर्ने इसुवा इनर्जी कम्पनी छ । कम्पनीले संखुवासभाको मकालु गाउँपालिकामा आयोजना निर्माण गर्न गत बैशाख १७ गते आवेदन दिएको थियो ।
यसैगरी, २२ मेगावाटको मध्य होंगु खोला ‘ए’ निर्माण गर्न एपेक्स मकालु हाइड्रो पावर कम्पनी र २२.९ मेगावाटको मध्य होंगु खोला ‘बी’ले निर्माण गर्न गौरीशंकर पावर डेभलपमेन्ट लिमिटेडले आवेदन दिएका छन् । दुवै कम्पनीले जेठ ७ गते आवेदन दिएका थिए । उता कपिलवस्तुको गणेशपुरमा १० मेगावाटको सोलार आयोजना निर्माण गर्न पोजेटिभ इनर्जी प्रालिले बैशाख २३ गते आवेदन दिएको छ ।
यस अवधिमा ९.०५ मेगावाटको सुपर चेपे खोला निर्माण गर्न अनुमतिपत्र जारी गरिएको छ । विभागले रिड्गे लाइन इनर्जीलाई जेठ ७ गते अनुमतिपत्र दिएको थियो । यो आयोजना गोरखाको खरिबोट र लमजुङको दूधपोखरीमा निर्माण हुनेछ ।
.jpg)
