ऊर्जा खबर
काठमाडौं । संखुवासभामा निर्माण सम्पन्न भएको १४.९ मेगावाटको माया खोला जलविद्युत आयोजनाबाट व्यापारिक विद्युत उत्पादन सुरु भएको छ । गत फागुन ४ गतेदेखि नै परीक्षण थालेको आयोजनाले झण्डै साढे ४ महिनापछि मात्र व्यापारिक उत्पादन गर्न सकेको हो ।
आयोजना निर्माणस्थलमै पुगेर प्रवद्र्धक माया खोला हाइड्रो पावर कम्पनीका अध्यक्ष विजयमान शेरचनले आज (असार २२ गते) अपरान्ह १२ बजेदेखि विद्युत व्यापारिक उत्पादनको उद्घाटन गरेका छन् । फागुनमै परीक्षण थाले पनि केही प्राविधिक समस्या देखिएकोले त्यसको समाधान गरी व्यापारिक उत्पादन सुरु गरिएको अध्यक्ष शेरचनले बताए ।
असार ७ गतेदेखि उत्पादन सुरु गरी १५ दिनको उत्पादन नेपाल विद्युत प्राधिकरणलाई निशुल्क ग्रिडमा उपलब्ध गराएपछि व्यापारिक उत्पादन सुरु भएको पनि शेरचनले बताए । उनका अनुसार १५ दिनमा आयोजनाले यस अवधिमा प्राधिकरणलाई झण्डै २ करोड रुपैयाँ बराबरको ५८९५.११ मेगावाट घन्टा विद्युत निशुल्क उपलब्ध गराएको छ । आयोजनामा ७.७५ मेगावाटका दुई वटा टर्बाइन जडित छन् ।
आयोजनाबाट उत्पादित विद्युत विद्युतगृहदेखि ३ किलोमिटर दूरीमा रहेको प्राधिकरणको कोसी कोरिडोर तुम्लिङटार–इनरुवा खण्डको २२० केभी बानेश्वर सबस्टेसनमा जोडिएको छ । सबस्टेसनसम्मको आवश्यक ३३ केभी लाइन कम्पनी आफैले निर्माण गरेको छ । आयोजनाबाट २०७८ असार नै देखि विद्युत उत्पादन गर्ने तालिका रहे पनि कोरोना महामारीको दोस्रो चरणमा ४० जना बढी कामदार तथा कर्मचारी संक्रमित हुन पुगे । यसबाट निर्माण प्रभावित हुँदा विद्युत उत्पादनको तालिका प्रभावित भएको कम्पनीले जानकारी दिएको छ ।
प्राधिकरणले काेसी काेरिडाेर निर्माण गर्न ढिला गरेका कारण आयाेजनाकाे विद्युत उत्पादन अवधि पनि सर्दै आएकाे तर हालकाे अवस्थामा उत्पादनमा समस्या नरहेकाे आयाेजना संयाेजक भरत लामिछाने थापाले बताए । 'अहिले पूर्वमा बाढी आएर धेरै आयाेजनाहरू सञ्चालनमा आएका छैनन् तर माया खाेलामा कुनै समस्या छैन,' उनले भने ।
सुपर सिक्स अन्तर्गतको यो आयोजनाबाट वार्षिक ८ करोड १५ लाख ६५ हजार ६ सय ५४ युनिट विद्युत उत्पादन हुनेछ । साथै, यो आयोजनाको सम्पूर्ण निर्माणको काम २ अर्ब ५० करोड रुपैयाँमा पूरा भएको दाबी गरिएको छ । ७० प्रतिशत बैंककाे लगानी र ३० प्रतिशत स्वपुँजी लगानी अनुपातमा निर्माण भएकाे आयाेजनामा सिटिजन्स इन्टरनेशनल बैंककाे अगुवाइमा हिमालयन बैंक र प्रमु बैंककाे लगानी रहेकाे छ ।
