ऊर्जा खबर
काठमाडौं । विद्युत विकास विभागले प्रदेश–१ को संखुवासभामा प्रस्तावित २२० केभी डबल सर्किट तुम्लिङटार–शीतलपाटी प्रसारण लाइन निर्माण गर्दा पर्न सक्ने प्रतिकुल प्रभावका सम्बन्धमा राय/सुझाव मागेको छ । विभागले प्रस्तावित प्रसारण लाइन आयोजनाको निर्माण अनुमतिपत्र दिनुअघि स्थानीय क्षेत्रमा पर्न सक्ने प्रतिकुल प्रभावबारे सम्बन्धित सरोकारवालासँग लिखित राय/सुझाव मागेको हो ।
विभागले ३५ दिने सूचना निकालेर १३.६१५ किलोमिटर लाभो प्रसारण लाइन निर्माण तथा सञ्चालन गर्दा प्रतिकुल असर पर्ने देखिएमा त्यस सम्बन्धमा आफ्नो कार्यालय वा नेपाल विद्युत प्राधिकरणमा लिखित राय/सुझाव पेश गर्न आग्रह गरेको छ ।
विद्युत ऐन २०४९ को दफा ४ को व्यवस्था अनुसार विद्युत नियमावली, २०५० को नियम १३ भएको व्यवस्था बमोजिम विद्युत प्राधिकरणले प्रसारण लाइनको निर्माण अनुमतिका लागि आवेदन दिएकाले सम्बन्धित सरोकारवालाबाट राय/सुझाव मागिएको विभागले जनाएको छ । विद्युत प्राधिकरणले यो प्रसारण लाइन आयोजनाको अध्ययन पूरा गरिसकेको छ ।
विद्युत प्राधिकरणले अध्ययन पूरा गरेर निर्माण अनुमतिका लागि विभागमा आवेदन पेश गरेको थियो । भोजपुर र संखुवासभामा निर्माणाधीन तथा निर्माण हुने जलविद्युत आयोजनाको विद्युत प्रवाह गर्न शीतलपाटी सबस्टेसनदेखि तुम्लिङटारसम्म २२० केभी डबल सर्किट प्रसारण लाइन निर्माण गर्न लागिएको हो ।
यो २२० केभी कोसी कोरिडोरको सहायक प्रसारण लाइन आयोजना हो । यो प्रसारण लाइन निर्माण सम्पन्न हुँदा ६ सय मेगावाट विद्युत प्रवाह गर्न सकिनेछ । विद्युत प्राधिकरणले शीतलपाटी सबस्टेसनमा जोडिने गरी यसअघि नै ४ सय मेगावाटका जलविद्युत आयोजनाको विद्युत खरिद सम्झौता (पिपिए) गरेको छ ।
पिपिए भइसकेका यी आयोजना अहिले निर्माणको विभिन्न चरणमा छन् । प्रसारण लाइन आयोजना अन्तर्गत जिल्लाको खाँदबारी–१० शीतलपाटीमा २२०/१३२/३३ केभी सबस्टेसन निर्माण हुनेछ ।
प्रसारण लाइनका लागि ४२ वटा टावर निर्माण हुनेछन् । विद्युत प्राधिकरणले प्रसारण लाइन आयोजना निर्माण गर्न ५१.५०२५ हेक्टर जग्गा अधिग्रहण गर्नुपर्नेछ । जसमा १३.९३७ हेक्टर शीतलपाटी सबस्टेसन र प्रसारण लाइनको टावर राख्नका लागि आवश्यक पर्ने देखिएको छ । बाँकी ३७.५६५५ हेक्टर ‘राइट अफ वे’ का लागि उपयोग हुनेछ ।
विद्युत प्राधिकरणले निर्माण सुरु भएको ३ वर्षमा प्रसारण लाइनको काम सम्पन्न भरी सञ्चालनमा ल्याउनेछ । २०७० सालमा यो प्रसारण लाइन निर्माण गर्ने अवधारण बनेको थियो । प्रसारण लाइनको शीतलपाटी सबस्टेसनमा जोडिने गरी पिपिए भएका १५ जलविद्युत आयोजना अहिले निर्माणको विभिन्न चरणमा छन् ।
यी आयोजनाले उत्पादन गर्ने विद्युत यही प्रसारण लाइन हुँदै कोसी कोरिडोरको तुम्लिङटार सबस्टेसनसम्म पुर्याइनेछ । पहिले कोसी कोरिडोरको बानेश्वर सबस्टेसनमा जोडिने गरी प्रसारण सम्झौता भएका केही जलविद्युत आयोजना शीतलपाटीमा जोडिनेछन् ।
.jpg)
