पावर ट्रान्सफर्मर जलेपछि रानी–जमरा–कुलरियाकाे विद्युत् उत्पादन एक महिनादेखि ठप्प

भजनी । रानी–जमरा–कुलरिया बहुउद्देश्यीय आयोजना अन्तर्गत सञ्चालित ४.७१ मेगावाटकाे जलविद्युत् केन्द्रकाे उत्पादन ठप्प भएकाे छ । कैलालीको जानकी गाउँपालिका–९ कटासेस्थित साे जलविद्युत् आयोजनाबाट विद्युत् उत्पादन ठप्प भएकाे हाे । राष्ट्रिय गौरवको आयोजनामार्फत निर्माण भएको जलविद्युत् ट्रान्सफर्मरमा समस्या आएपछि १ महिनादेखि बन्द अवस्थामा रहेको छ । 

विद्युत् गृहमा रहेकाे ३३ केभीकाे पावर ट्रान्सफर्मर जलेकाे र साे ट्रान्सफर्मर नेपालबाहिरबाट ल्याउनुपर्ने हुँदा पुनः सञ्चालन गर्न समय लागेको केन्द्रले जनाएकाे छ । 

‘नेपालमा सामान पाइएन, भारतमा पनि उत्पादन गरेरै ल्याउनुपर्ने भएको हुँदा समय लागेको हो,' तुन्दी निर्माण कम्पनीका उदयराज पोख्रेलले भने, ‘पहिलेको पुरानो सामानको स्याम्पल पठाएपछि मात्रै सामान बन्यो । अब १ हप्ताभित्र सामान पुग्ने भनिएको छ । सामान जडान गरेर पुनः विद्युत् उत्पादनलाई निरन्तरता दिन्छौँ ।’

५ पटकसम्म म्याद थप गरेर काम सम्पन्न गरेको निर्माण कम्पनीले अझै पनि क्षमता अनुसारको विद्युत् उत्पादन गर्न सकेको छैन । ४.७१ मेगावाट विद्युत् उत्पादन क्षमता भए पनि अहिले ३.१४ मेगावाट विद्युत् उत्पादन हुँदै आएको थियो । ३ वटा युनिटबाट विद्युत् उत्पादन गर्न सकिने भए पनि २ वटा युनिटबाट मात्रै विद्युत् उत्पादन हुँदै आएको रानी जमरा कुलरिया सिँचाइ आयोजनाका सूचना अधिकारी नवीन पौडेलले जानकारी दिए ।

‘पूर्णरूपमा अझै विद्युत् उत्पादन हुन सकेको छैन, क्षमताअनुसार विद्युत् उत्पादन भएपछि मात्रै त्यसको स्वामित्व सिँचाइ आयोजनाले ग्रहण गर्छ,‘ पौडेलले भने, ‘आउने पुससम्म निर्माण कम्पनीको सम्झौता अनुसारको समय छ । त्यो अवधिसम्म सबै काम सम्पन्न गरेर हस्तान्तरण गर्ने भनेको छ ।’

सो क्षेत्रबाट उत्पादन भएको विद्युत् २०८० फागुनमा राष्ट्रिय प्रसारण लाइनमा जोडिएको थियो । ३३ केभी लम्की सब–स्टेसनबाट राष्ट्रिय प्रसारण लाइनमा जोडिएको निर्माण कम्पनीका साइट इन्चार्ज पोख्रेल बताउँछन् ।