ऊर्जा खबर
काठमाडौं । दाङको तुलसीपुरमा सार्वजनिक सवारी साधनकाे ठक्करले २५ विद्युतीय पोलमा क्षति पुगेकाे छ । बैशाख यता गुडिरहेका सवारी साधनले सडक किनारका विद्युतीय पाेलमा ठक्कर दिँदा क्षति पुगेकाे हाे ।
प्रसारण तथा वितरण लाइनका विद्युतीय पाेलमा गुडिरहेका सवारी साधनले ठक्कर दिँदा संरचनामा ठूलाे क्षति पुगेकाे नेपाल विद्युत प्राधिकरण तुलसीपुर वितरण केन्द्र प्रमुख जगननाथ लामिछानेले बताए । उनका अनुसार निशेधाज्ञाकाे समयमा खाली रोडमा तीव्र गतिमा गुडेका सवारी साधन सडकमा अनियमित भई विद्युतीय पोलमा ठाेक्किँदा प्राधिकरणकाे संरचनामा क्षति पुगेकाे हाे ।
‘पछिल्लो समय विनाकारण विद्युतीय पोल गाडी ठाेक्ने गतिविधि धेरै बढेकाे छ’ उनले ऊर्जा खबरसँग भने, ‘यही कारण विद्युत आपूर्ति अनियमित हुने समस्या पनि बढिरहेकाे छ ।’ उनले यही सातामा मात्रै २ वटा विद्युतीय पाेलमा क्षति गरेकाे उनले बताए ।
दिउँसाे विद्युतीय पाेलमा ठक्कर दिएर क्षति पुर्याउने माथि स्थानीयको सुझाव अनुसार पक्राउ गरी कारबाही प्रक्रिया अघि बढाउने गरिएकाे भए पनि रातकाे समयमा कारबाही गर्न नसकिएकाे उनले बताए । रातकाे समयमा ठक्कर दिने सवारी साधन पाेलमा क्षति पुर्याएर भाग्ने गरेकाले कारबाही गर्न नसकिएकाे वितरण केन्द्रले जनाएकाे छ ।
तुलसीपुर क्षेत्रमा मानविय लापरबाहीले गर्दा अत्यधिक मात्रामा विद्युतीय संरचनामा क्षति पुग्ने पनि लामिछानले बताए । १ साता अघि पनि मादक पदार्थ सेवन गरेका व्यक्तिले विद्युत प्रसारण भइरहेको ३३ केभी लाइनमा कुकुर बाँध्नका लागि प्रयोग हुने साङ्लो अड्काउँदा तुलसीपुर सबस्टेसनमा जडान भएको ८ एमभिएको पावर ट्रान्सफर्मर जलेको छ ।
मानवीय लापरवाहीका कारणले विद्युत सेवा अवरुद्ध हुनुका साथै पोल, तार, क्वाइल, फिडरहरू समेत मर्मत गर्नुपर्ने अवस्था आएकाे लामिछानेले बताए । मानवीय गल्तीका कारण करोडौँको विद्युतीय संचरनामा क्षती पुगेको छ ।
विद्युतीय पोलमा सवारी ठोक्काउँदा, सामान फाल्दा तारहरू एक आपसमा जोडिन्छ र विद्युत सर्ट हुन्छ । यसाे हुँदा विद्युतीय दुर्घटनाकाे जाेखिम पनि बढ्ने गरेकाे वितरण केन्द्रले जनाएकाे छ ।
संरचनामा क्षति पुगेर विद्युत आपूर्ति बन्द हुँदा स्थानीय सेवाग्राहीले लोडसेडिङ गरेकाे भनी प्राधिकरणका कर्मचारी माथि आक्राेश पाेख्ने गरेकाे उनकाे गुनासाे छ । यस वितरण केन्द्र अन्तर्गत करिब ४५ हजार ग्राहक छन् ।
