ऊर्जा खबर
काठमाडौं । भारतको विद्युत माग यो वर्ष अधिकतम १० प्रतिशतसम्म बढ्ने भएको छ । सन् २०२२ मा अघिल्लो वर्षको तुलनामा ८ देखि १० प्रतिशत विद्युत माग बढ्न सक्ने प्रक्षेपण गरिएको हो ।
यसअघि चालू वर्षमा विद्युत माग बढेर १२ प्रतिशतसम्म पुग्ने प्रक्षेपण गरिएको थियो । कोराना (कोभिड–१९) महामारीको प्रभावले उद्योगधन्दा नियमित सञ्चालन हुन नपाउँदा लक्ष्यअनुसार खपत बढाउन नसकिने अवस्था देखिएपछि खपतको अनुमानित लक्ष्य संशोधन भएको अन्तर्राष्ट्रिय सञ्चार माध्यमहरूले जनाएका छन् ।
यो वर्ष विद्युत मागको बृद्धि १० प्रतिशतसम्म मात्र जान सक्ने अवस्था आएको त्यहाँको एचडिएफसी सेक्योरिटिजले प्रक्षेपण गरेको रिर्पोटमा उल्लेख छ । भारतमा हरेक वर्ष विद्युतको उच्च माग औसतमा साढे ९ प्रतिशतसम्म स्वतः बृद्धि हुने गरेको तथ्यांक छ ।
२०२१ को डिसेम्बर महिनामा विद्युत मागमा साढे २ प्रतिशत मात्रै बृद्धि भएको समाचारमा जनाइएको छ । भारतमा कोरोना महामारीको संक्रमण दर बढ्दै गएपछि जनवरी महिनामा यो बृद्धिदर घटेर साढे १ प्रतिशतमा सिमित हुन पुगेको तथ्यांकमा उल्लेख छ ।
विद्युतको मागमा आएको गिरावट तथा कोइला आपूर्तिमा सहजता हुँदा कोइलाबाट सञ्चालित थर्मल प्लान्टहरूले मागको ३ गुणा बढी कोइला भण्डार गरेको समाचारमा उल्लेख छ । रिर्पोटका अनुसार सेप्टेम्बर महिनामा थर्मल प्लान्टहरूमा कोइलाको आपूर्ति ४१.५ प्रतिशतबाट बढेर ६३.३ प्रतिशत पुगेको थियो । डिसेम्बर महिनामा आधारभुत ‘डेफिसिट’ सामान्यरूपमा ०.४ प्रतिशत बढेको थियो । तर, ‘पिक डेफिसिट’ भने ०.१ प्रतिशतदेखि ०.६ प्रतिशतसम्म कम हुन गएको थियो । यो अवधिको विद्युत महसुल दर प्रतियुनिट ३.२ भारु थियो ।
सन् २०२२ को जनवरी महिनामा वितरण कम्पनीहरूको विद्युत महसुलको बक्यौता १० अर्ब ६६ करोड भारु पुगेको छ । सन् २०२१ को डिसेम्बरसम्ममा भारतको विद्युत जडित क्षमता ३ लाख ९३ हजार मेगावाट पुगेको छ । जसमा नवीकरणीय ऊर्जाको हिस्सा ३७ प्रतिशत छ ।
अन्तर्राष्ट्रिय समाचार एजेन्सीहरूको सहयोगमा अनुवाद
