ऊर्जा खबर
नयाँ दिल्ली । भारतले करिब १ वर्षमा ९ हजार ७ सय मेगावाट उत्पादन गरेको छ । उसले अप्रिल २०२० देखि फेब्रवरी २०२१ को अवधिभित्र नवीकरणीय तथा परम्परागत ऊर्जाको स्रोतबाट यति विद्युत उत्पादन गरेको हो ।
प्रसारण प्रणालीमा ९ हजार ७ सय मेगावाट विद्युत थपिएसँगै विद्युतको जडित क्षमता ३ लाख ७९ हजार १ सय मेगावाट पुगेको तथ्यांक भारतीय ऊर्जा मन्त्री आरके सिंहले राज्यसभामा प्रस्तुत गरेको भारतीय सञ्चार माध्यमहरूले जनाएका छन् ।
प्रणालीमा थपिएको विद्युत मध्ये ३ हजार ८ सय मेगावाट परम्परागत ऊर्जाको स्रोतबाट उत्पादन गरिएको सिंहले बताए । ‘यो वर्ष कोइलामा आधारित थर्मल प्लान्ट र नवीकरणीय ऊर्जाका स्रोतबाट विद्युत उत्पादन गरेर प्रणालीमा जोडिएको छ,’ उनले भने, ‘जसमा नवीकरणीय ऊर्जाको स्रोतको हिस्सा ५ हजार ९ सय मेगावाट छ ।’
यो वर्षको उत्पादन गत आर्थिक वर्ष (२०१९/२०) को भन्दा ६ हजार १ सय मेगावाट कम हो । गत आर्थिक वर्षमा १५ हजार ८ सय मेगावाट विद्युत उत्पादन गरेको थियो । जसमा ७ हजार १ सय मेगावाट परम्परागत ऊर्जाका स्रोतबाट उत्पादन भएको थियो भने ८ हजार ८ सय मेगावाट नवीकरणीय ऊर्जाका स्रोतबाट उत्पादन भएको थियो ।
भारतले पछिल्लो ५ वर्षमा मात्रै १ लाख १७ हजार ९ सय मेगावाट विद्युत प्रणालीमा जोडिसकेको छ । जसमा ६४ हजार ५ सय मेगावाट परम्परागत ऊर्जाको स्रोतबाट र ५३ हजार ४ सय मेगावाट नवीकरणीय ऊर्जाका स्रोतबाट उत्पादन भएको सिंहले जानकारी दिए ।
आर्थिक वर्ष २०२६/२७ भित्र कूल जडित क्षमता ६ लाख ९९ हजार ६६ मेगावाट पुर्याउने लक्ष्य राखिएको पनि सिंहले बताए । अबको ५ वर्षमा निर्धारण गरिएको लक्ष्य अनुसार २ लाख ३८ हजार मेगावाट कोइलामा आधारित थर्मल प्लान्टबाट, २५ हजार ७ सय ३५ मेगावाट ग्यासबाट उत्पादन गरिने भएको छ ।
यस्तै, ६३ हजार ३ सय १ मेगावाट जलविद्युतबाट, १६ हजार ८ सय ८० मेगावाट आणविक भट्टीबाट र २ लाख ७५ हजार मेगावाट नवीकरणीय ऊर्जाका स्रोतबाट उत्पादन गरिने उनले बताए ।
भारतीय सञ्चार माध्यमकाे सहयाेगमा अनुवाद
