तल्लो इन्द्रावती जलविद्युत् आयाेजनाकाे पुनः निर्माण सुरु

काठमाडौँ । नेशनल हाइड्रो पावर कम्पनी लिमिटेडले तल्लो इन्द्रावती जलविद्युत् आयोजनाको निर्माण सुरु गरेको छ । लामो समयदेखि सिन्धुपाल्चोकमा अलपत्र परेको ४.५ मेगावाटको तल्लो इन्द्रावतीको संरचनाको निर्माण सुरु भएको हो ।

२०६७ सालमा खारेज भई निर्माण बन्द भएको आयोजनाको पुनःनिर्माण सोमबार (माघ १५ गते) देखि सुरु भएको कम्पनीले जनाएको छ ।  यो आयोजना १३ वर्षदेखि अलपत्र थियो ।

२०८२ भित्र निर्माण सम्पन्न गर्ने लक्ष्यका साथ सोमबार एक औपचारिक कार्याक्रमको आयोजना गरी सुरुङमा विस्फोटक पदार्थ पड्काएर सुरुङ खन्ने काम थालनी गरेको कम्पनीका अध्यक्ष कुमार पाण्डेले बताए । उनले आयाेजनालाई याे अवधिसम्म ल्याउन धेरै दुख, खर्च लागेकाे जानकारी दिँदै डेढवर्षभित्र निर्माण सम्पन्न गर्नेगरी काम गर्ने प्रतिबद्धता व्यक्त गरे । सुरङकाे आँधी काम यसअघि नै सम्पन्न भइसकेकाे छ ।

यो आयोजना यसअघि करिब ४० प्रतिशत निर्माण सम्पन्न भइसकेपछि अनुमतिपत्र खारेज गरेर सरकारको बास्केटमा राखिएको थियो । आयोजना निर्माण गरी सञ्चालन हुने अवधिभरका लागि ६२ करोड रुपैयाँ तिर्ने गरी २०७८ असारमा नै अनुमतिपत्र पुरानै कम्पनीलाई दिने आशयपत्र (लेटर अफ इन्टेन्ट–एलओआइ) जारी गरेको थियो ।

आशयपत्र जारी भएपछि कुनै कम्पनी दाबी विरोध गर्न नआएपछि नेशनल हाइड्रोले अनुमतिपत्रका लागि विभागमा आवेदन दिएको थियो । विभागले आवेदन दिएपछिको प्रक्रिया पूरा गरेर कम्पनीको नाममा आयोजनाको अनुमतिपत्र जारी गरी निर्माण गर्न बाटो खोलिदिएको थियो । कम्पनीले अध्ययन पूरा गरेर पनि विभागबाट २०८० बैशाख २० गते उत्पादन अनुमति पाएको छ ।

बागमती प्रदेश अन्तर्गत सिन्धुपाल्चोक जिल्लाको मेलम्ची नगरपालिकामा रहेको इन्द्रावती तेस्रो जलविद्युत् आयोजनाको टेलरेसबाट निस्केको पानीको प्रयोग गरी सोही खोलाको दायाँ किनारमा मुख्य संरचनाहरू रहने गरी डिजाइन तयार पारिएको छ ।

यस आयोजनाबाट वार्षिक सरदर २९.९८ गिगावट घण्टा विद्युत् उत्पादन हुनेछ । विद्युत्‌गृहमा जडित २ वटा फ्रान्सिस टर्वाइन र २ वटा ३ फेज जेनेरेटरमार्फत ४.५ मेगावाट विद्युत् उत्पादन गरिनेछ र त्यहाँबाट निस्केको पानीलाई ५० मिटर लामो टेलरेसबाट पुनः इन्द्रावती खोलामा छाडिनेछ ।

आयोजनाबाट उत्पादित विद्युत् नेपाल विद्युत् प्राधिकरणको २०० मिटर लामो ६६ केभी सिंगल सर्किट प्रसारण लाइन मार्फत पाँचखाल सबस्टेसनमा जाडिनेछ । आयोजनाको विद्युत् खरिद सम्झौता (पिपिए) र कनेक्सन एग्रिमेन्ट (प्रसारण सम्झौता) सम्पन्न भइसकेको छ ।

आयोजना सम्पन्न गर्न १ अर्ब १० करोड रुपैयाँ लागत अनुमान गरिएको छ । आयोजनामा ज्योति विकास बैंकले ऋण लगानी गर्ने भएको छ । आयोजनामा बैंकको नेतृत्वमा ५० प्रतिशत ऋण लगानी हुने गरी सम्झौता भइसकेको छ । बाँकी ५० प्रतिशत स्वपुँजी लगानी हुने छ ।