ऊर्जा खबर
काठमाडौँ । विद्युत् विकास विभागले आफ्नो नामाकरण भएपछिका २५ वर्षमा ८ हजार ८३७ मेगावाटका विभिन्न ६२ वटा आयोजनाको सम्भाव्यता तथा वातावरणीय अध्ययन विभिन्न चरणमा पुर्याएको छ । यसमध्ये आर्थिक वर्ष (आव) २०८०/८१ सम्ममा ४३०७.६४ मेगावाटका ४१ जलविद्युत् आयोजनाको अध्ययन पूरा गरिसकेको छ ।
अध्ययन पूरा भएका आयोजनाहरूमा २ हजार ४०८ दशमलव ७४ मेगावाटका जलाशय (स्टोरेज), १ हजार २९४ दशमलव १३ मेगावाटका नदी प्रवाहमा आधारित (आरओआर) र ६०४.७७ मेगावाटका आंशिक जलाशय (पीआरओआर) आयोजना रहेका छन् ।
त्यस्तै, विभागले हाल ४ हजार ५२९.१० मेगावाटका २१ वटा जलविद्युत् आयोजनाको अध्ययन कार्य विभिन्न चरणमा पुर्याएको छ । यीमध्ये ३ हजार २९१.३३ मेगावाटका जलाशय, ९६५.२४ मेगावाटका आंशिक जलाशय र २७२.६२ मेगावाटका नदी प्रवाही आरओआर आयोजना छन् ।
विभिन्न चरणमा रहेका यी आयोजनाको अध्ययन विभागले आव २०८२/८३ सम्म पूरा गर्ने लक्ष्य राखेको जनाएको छ ।
२०५० साल साउन १ गते तत्कालीन जलस्रोत मन्त्रालयको विभागीय इकाईको रूपमा विद्युत् विकास केन्द्रको स्थापना भएको थियो । सोही केन्द्रलाई २०५६ साल माघ २४ गतेको मन्त्रिपरिषद् बैठकले ‘विद्युत् विकास विभाग’ नामाकरण गरेको थियो । नामाकरणसँगै विभागले विद्युत् आयोजनाको पहिचान, सम्भाव्यता तथा वातावरणीय अध्ययन गर्ने कार्य शुरू गरेको थियो । २०८१ साउन १ गते विभागले आफ्नो ३१ औँ वार्षिकोत्सव मनाएको छ ।
