१९८ प्रसारण लाइन आयोजनालाई निर्माण अनुमति

काठमाडौं । १ सय ९८ प्रसारण लाइन आयोजनाले निर्माण अनुमति पाएका छन् । विद्युत विकास विभागले अहिलेसम्म ४ सय केभीदेखि ११ केभी क्षमताका प्रसारण लाइन आयोजनालाइ निर्माण अनुमतिपत्र दिएको हो ।

निर्माण सम्पन्न भएका, निर्माणाधीन र निर्माणमा जाने आयोजनाको विद्युत प्रवाह गर्ने उद्देश्यले सरकार तथा निजी क्षेत्रले प्रसारण लाइन आयोजना निर्माण गर्न अनुमतिपत्र लिएको विभागले जनाएको छ । विभागका अनुसार यी आयोजना निर्माणका विभिन्न चरणमा छन् । 

अनुमतिपत्र जारी भएका प्रसारण लाइनको क्षमता ४ सय केभी, २ सय २० केभी, १ सय ३२ केभी, ६६ केभी, ३३ केभी र ११ केभी छ । ती मध्ये ४०० केभीको ७ प्रसारण लाइन रहेका छन् । ४०० केभी क्षमताका ३९ किलोमिटर लामो ढल्केबर–बिर्तामोड प्रसारण लाइन निर्माण गर्न नेपाल विद्युत प्राधिकरणले २०६८ भदौमा निर्माण अनुमति पाएको विभागको तथ्यांकमा उल्लेख छ ।

यस्तै, २८५ किलोमिटर लामो हैटौंडा–ढल्केबार, १०० किलोमिटरको तामाकोसी–काठमाडौं, २१७ मिटरको अरुण–३, ५४ किलोमिटरको फुकोट–बेतन, ३७ किलोमिटरको बेतन–दोदोधारा र ३० किलोमिटरको दोदोधारा–कर्मदेभ प्रसारण लाइनले निर्माण अनुमति पाएको विभिागले जनाएको छ ।

यस्तै, २२० केभीको २४, १३२ केभीको ९१, ६६ केभीको ५, ३३ केभीको ७० र ११ केभीको एक प्रसारण लाइन निर्माणका विभिन्न चरणमा छन् ।