रसुवागढीले मुडभरीसँगकाे ठेक्का तोड्यो, प्रसारण लाइनकाे बाँकी काम गर्न प्रस्ताव आह्वान

काठमाडौं । रसुवागढी हाइड्रो पावर कम्पनी लिमिटेडले आफ्नो १११ मेगावाटको विद्युत उत्पादन जोडिने प्रसारण लाइन निर्माण गर्ने ठेकेदार मुडभरी एण्ड जोशी कन्स्ट्रक्सन प्रा.लि. सँगको ठेक्का सम्झौता ताेडेकाे छ । कम्पनीले ठेकेदारको कमजोर कार्यसम्पादनका कारण प्रसारण लाइनको निर्माण कार्यले गति लिन नसकेपछि सम्झौता रद्द गरेको हो ।

ठेकेदारको कमजोर कार्यसम्पादनका कारण लाइनको निर्माण सुस्त गतिमा अघि बढेकोले सम्झौता रद्द गरेको आयोजना प्रमुख सत्यराम ज्याख्वाले बताए । ‘सन्तोषजनक काम नभएपछि ठेक्का रद्द गरिएको हो’, उनले ऊर्जा खबरसँग भने । ‘विविध कारण पटकपटक म्याद थप गर्दा पनि तोकिएको समयमा कार्य सम्पन्न हुने कुनै ठोस आधार नदेखिएपछि सम्झौता तोडिएको हो ।’

‘ठेकेदारलाई आवश्यक टावर निर्माण गर्न र तार ल्याउनलाई लिखित एवं मौखिक जानकारी गराई एक महिनाको अल्टिमेटम दिँदा पनि वेवास्ता गरेपछि ठेक्का तोडिएको छ’ उनले थपे । यस अवधिमा १० किलोमिटर लामो लाइनको ३२ मध्ये २७ वटा टावरको जग खन्ने काम पूरा भएको छ ।

जगसँगै टावर र तारको काम पनि गर्नुपर्छ, तर ठेकेदारले यसमा सन्तोषजनक काम नगरेको कम्पनीले जनाएको छ । ठेकेदारले ६ करोड रुपैयाँ खर्च गरेर २७ वटा जग खनेको छ । ठेकेदारसँग २३ करोड रुपैयाँ लागतमा लाइन सम्पन्न गर्ने गरी सम्झौता भएको थियो ।

कम्पनीले लाइनको बाँकी काम पूरा गर्न साउन २२ गते पुनः ठेक्का आह्वान गरेको छ । प्रस्ताव आह्वान गरेको एक महिनाभित्र इच्छुकले आवेदन दिन सक्नेछन् । प्राप्त बोलपत्र मुल्याङ्कन गरेर ६ महिनाभित्र काम पूरा गर्ने योजना रहेको पनि ज्याख्वालले बताए ।

यसैबीच जलविद्युत आयोजनाको काम पनि अन्तिम चरणमा पुगेको छ । हालसम्म करिब ८९ प्रतिशत निर्माण पूरा भएको आयोजनाको सिभिल, इलेक्ट्रोमेकानिकल सबै क्षेत्रको काम भइरहेको छ ।

सिभिलको काम ९० प्रतिशतभन्दा बढी पूरा भएको छ । उपकरण जडानको काम भने सुस्त गतिमा अघि बढेको छ । आयोजना स्थल पुग्ने पहुँच मार्गमा २ साता अघि आएको बाढीले सडक बन्द भए पनि आवश्यक सामान पुर्याउन नसक्दा गति लिन नसकेको पनि ज्याख्वालले बताए ।

आयोजनाको सबै काम पूरा गरेर २०७९ चैतभित्र उत्पादन सुरु गर्ने लक्ष्य छ । आयोजना सम्पन्न गर्न ब्याजबाहेक १७ अर्ब १ करोड रुपैयाँ लागत अनुमान गरिएको छ ।