ऊर्जा खबर
पर्सा । नेपाल विद्युत् प्राधिकरणकाे वीरगञ्ज वितरण केन्द्रले बुधबार कृषि औजार कारखाना वीरगञ्जमा ५०० केभीए क्षमताको विद्युत् ट्रान्सफर्मर जडान गरिदिएको छ ।
राष्ट्रिय अविष्कार केन्द्रले कृषि कारखानाको व्यवस्थापन र सञ्चालनको जिम्मा लिएसँगै उच्च क्षमताको विद्युत्काे अभावले विभिन्न समस्या झेल्नुपरेको बताउँदै आइरहेको थियो । प्राधिकरणले कारखानामा देखिएको विद्युत्को समस्या अन्त्य गर्नका लागि राष्ट्रिय अविष्कार केन्द्रसँगको सहकार्यमा बुधबारदेखि नयाँ ट्रान्सफर्मर जडान गरेर सञ्चालनमा ल्याएको हो ।
राष्ट्रिय अविष्कार केन्द्रका अध्यक्ष महावीर पुनले अबदेखि कृषि औजार कारखानाका लागि आवश्यकपर्ने विद्युत्को अभाव नहुने बताए । ‘विगतमा ६५ केभीए क्षमताको विद्युत् अस्थायी लाइनले काम चलाउँदै आइरहेका थियौँ’, उनले भने, ‘अब कारखानाका लागि आवश्यक पर्ने विद्युत्को अभाव हुने छैन’, केन्द्रका अध्यक्ष पुनले ट्रान्सफर्मर जडानका लागि प्राधिकरणको १५ लाख र केन्द्रको १२ लाख रुपैयाँ खर्च भएको बताए । केन्द्रले विगत २३ महिनादेखि कृषि औजार कारखानाको व्यवस्थापन र सञ्चालनको जिम्मेवारी लिएको हो । केन्द्रले हालसम्म करिब डेढ दर्जन कृषि औजार अनुसन्धान र विकास गरेको जनाएको छ ।
