ऊर्जा खबर
काडमाडौँ । राष्ट्रिय प्रसारण ग्रिड कम्पनी लिमिटेड (आरपीजीसीएल) र आईएमएस प्रालिबीच विद्युत् प्रसारणसम्बन्धी ‘ग्रिड कनेक्शन समझदारी’ पत्रमा हस्ताक्षर भएको छ । आईएमएस प्रालिले निर्माण गरिरहेको ३२५ मेगावाटको अपर जलविद्युत् आयोजनाको बिजुली आरपीजीसीएलले निर्माणका लागि प्रस्ताव गरेको नलगाड–मैनतडा (भेरी कोरिडोर) ४०० केभी प्रसारण लाइनअन्तर्गतको नलगाड ४००/१३२ केभी सबस्टेशनमा लाई जोड्न उक्त समझदारी गरिएको हो ।
समझदारी पत्रमा कम्पनीका प्रमुख कार्यकारी अधिकृत डा. नेत्रप्रसाद ज्ञवाली र आईएमएस प्रालिका अध्यक्ष दीपककुमार मल्होत्राले हस्ताक्षर गरेका छन् । समझदारी अनुसार उत्पादित विद्युत् देश तथा विदेशका भार केन्द्रहरूमा प्रसारित गर्न सकिने छ ।
आरपीजीसीएलका अनुसार भेरी नदी बेसिनमा पहिचान भई निर्माणका विभिन्न चरणमा रहेका जलविद्युत् आयोजना राष्ट्रिय प्रसारण प्रणालीमा जोड्न नलगाड–मैनतडा ४०० केभी डबल सर्किट प्रसारण लाइन निर्माणको प्रस्ताव गरिएको हो । करिब ७५ किलोमिटर लम्बाइको यो प्रसारण लाइनअन्तर्गत सुर्खेतको भेरीगङ्गा नगरपालिकामा मैनतडा सबस्टेशन र जाजरकोटको नलगाड नगरपालिकामा नलगाड सबस्टेशन रहनेछन् ।
नलगाड सबस्टेशनमा अपर भेरीसहित १०६ मेगावाटको जगदुल्ला, २७० मेगावाट भेरी–१, २०६ मेगावाटको भेरी–२ तथा अन्य जलविद्युत् आयोजनाका लागि एमओयू सम्पन्न भइसकेको छ । यी आयोजनासहित थप १८०० मेगावाट विद्युत् यो प्रसारण लाइनमार्फत केन्द्रीय प्रणालीमा जोडिने छ ।
कम्पनीका अनुसार भेरी कोरिडोर ४०० केभी प्रसारण लाइनको विस्तृत अध्ययन, डिजाइन, तथा वातावरणीय प्रभाव मूल्याङ्कन सम्पन्न भएको छ ।
आयोजनामा लगानीका लागि भारतको एक्जिम बैंकबाट करिब १३.५ अर्ब रुपैयाँ ऋण स्वीकृत हुने प्रक्रियामा छ । निर्माणका लागि आगामी माघमा टेन्डर आह्वान गरी आर्थिक वर्ष २०८७/८८ सम्ममा निर्माण सम्पन्न गर्ने लक्ष्य छ ।
डोल्पाको दुनैसम्म विद्युत् पुर्याउने लक्ष्य राखिएको यो आयोजना कर्णाली प्रदेशको विकासका लागि महत्त्वपूर्ण आधारस्तम्भका रूपमा रहने कम्पनीले जनाएकाे छ ।
