ऊर्जा खबर
काठमाडौं । विश्व व्यापीरूपमा फैलिएको कोरोना (कोभिड–१९) महामारीका कारण चिनियाँ प्राविधिक नेपाल नआएपछि सान्जेन जलविद्युत कम्पनीले निर्माण गरिरहेका २ जलविद्युत आयोजनाको इलेक्ट्रोमेकानिकल उपकरण जडान कार्य राेकिएकाे छ । रसुवामा निर्माणाधीन १४.८ मेगावाटको माथिल्लो र ४२.५ मेगावाटको सान्जेन जलविद्युत आयोजनामा उपकरण जडान कार्य १ वर्षदेखि राेकिएकाे हाे ।
इलेक्ट्रोमेकानिकलतर्फको ठेक्का लिएको चिनियाँ कम्पनीका प्राविधिक अहिलेसम्म चीनबाट नआएकाले काम सुरु गर्न नसकेको आयोजना प्रमुख अर्पणबहादुर सिंहले बताए । ‘माथिल्लो सान्जेनमा त सिभिलतर्फको सबै काम सम्पन्न भइसकेको छ,’ उनले ऊर्जा खबरसँग भने,‘प्राविधिक नआएर इलेक्ट्रोमेकानिलक उपकरण जडान सुरु गर्न सकिएन ।’
उनले माथिल्लो सान्जेनमा अब ९ महिना जतिको मात्रै काम बाँकी रहेको बताए । आयोजनाबाट गत कात्तिकदेखि विद्युत उत्पादन गर्ने तालिका थियो । थोरै काम बाँकी भए पनि तत्काल चिनियाँ प्राविधिक आउने अवस्था नरहेकाले कहिलेबाट काम सुरु हुने भन्ने निश्चित छैन । निशेधाज्ञा खुलेर अन्तर्राष्ट्रिय हवाई उडान सुरु नहुँदासम्म उनीहरू आउन सक्ने अवस्था छैन ।
विद्युतगृहमा इलेक्ट्रोमेकानिकल उपकरण जडान गर्न सुरु हुन नसक्दा माथिल्लो सान्जेनको विद्युत उत्पादन अनिश्चित बनेको छ । तिब्बतको लासामा रोकिएका हाइड्रो तथा इलेक्ट्रोमेकानिकल उपकरण भने आयोजना स्थलमा आइरहेको उनले बताए । मंगलबार पनि उपकरण बोकेका ८ वटा ट्रक रसुवागढी नाका हुँदै आयोजना स्थलमा आइपुगेका छन् ।
यस्तै, सान्जेनमा पनि हाइड्रोमेकानिकल र इलेक्ट्रोमेकानिकलको काम मात्र बाँकी रहेको उनले बताए । अहिले आयोजनामा पेनस्टक जडानको काम रोकिएको छ । पेनस्टकको काम गर्ने १८ जना कामदारमा कोरोना संक्रमण देखिएपछि काम रोकिएको सिंहले बताए ।
संक्रमित भएका मध्ये गत शुक्रबार १ जनाको मृत्यु भएको थियो । संक्रमित सबै कामदार आइसोलेसनमा बसेका छन् । १ हजार ३ सय ७६ मिटर लामो हेडरेस पाइपको काम भने भइरहेको कम्पनीले जनाएको छ । सुरक्षाका मापदण्ड अपनाएर एक साताभित्र बाँकी काम पनि सुरु गर्ने तयारी भइरहेको छ । सान्जेको ८० प्रतिशत निर्माण पूरा भइसकेको छ ।
दुवै आयोजना सम्पन्न भई सञ्चालनमा आएपछि उत्पादन हुने विद्युत चिलिमे हब सबस्टेसनमा जोडिनेछ । सबस्टेसनसम्मको आवश्यक ६ किलोमिटर लामो प्रसारण लाइन कम्पनी आफैले निर्माण गर्दैछ ।
कोरोना असरले प्रसारण लाइनको काम पनि प्रभावित भएको छ । प्रसारण लाइनका २० वटा मध्ये १६ वटा टावर खडा भइसकेका छन् । बाँकी ४ वटाको जग खन्ने काम सकिएको छ ।
