ऊर्जा खबर
काठमाडौँ । भारतीय सरकारी सार्वजनिक कम्पनी एनटीपीसी लिमिटेडको सहायक कम्पनी एनटीपीसी ग्रिन इनर्जी लिमिटेडले १० हजार करोड भारु (१ खर्ब ६० अर्ब रुपैयाँ) बराबरको प्राथमिक शेयर (आईपीओ) जारी गर्ने भएको छ । यसका लागि कम्पनीले मस्यौदा तयार पारी सम्बन्धित निकायमा दर्ता गरेको छ । विभिन्न परियोजनाका लागि लिएको ऋण तिर्न तथा कम्पनी सञ्चालनका लागि आईपीओबाट रकम जुटाउन लागिएको कम्पनीले जनाएको छ ।
सन् २०३० सम्म कम्तीमा ५०० गिगावाट स्वच्छ ऊर्जाको उत्पादन थप गर्ने भारतको लक्ष्यलाई कम्पनीको यो योजनाले सघाउने विश्वास गरिएको छ । एनटीपीसी ग्रीन इनर्जीको हालको नवीकरणीय ऊर्जा उत्पदनको जडित क्षमता ३.३ गिगावाट छ । आगामी वर्षहरूमा यो क्षमतामा उल्लेख्य वृद्धि ल्याउने योजना कम्पनीले बनाएको छ ।
कम्पनीले सुजलोनसँग मिलेर भारतको सबैभन्दा ठूलो वायु ऊर्जा परियोजना विकास गर्न साझेदारी गरेको छ, जसले झन्डै ३० लाख घरहरूलाई बिजुली आपूर्ति गर्ने क्षमता राख्छ । परियोजनाअन्तर्गत गुजरातमा ३७० वटा वायु ऊर्जा प्लान्टका टर्बाइन जेनेरेटरहरू जडान गर्ने योजना छ ।
एनजीईएलसँग भारतभर थुप्रै सौर्य ऊर्जा परियोजना पनि सञ्चालनमा छन्, तीनले देशको नवीकरणीय ऊर्जा क्षमतामा महत्त्वपूर्ण योगदान दिएको छ । सौर्य र वायु ऊर्जाबाहेक कम्पनीले हरित हाइड्रोजन र हरित मिथानोल उत्पादनमा पनि लगानी गरिरहेको छ, जुन नवीकरणीय ऊर्जाबाट उत्पादन गरिने स्वच्छ इन्धन हुन् ।
कम्पनीले नवीकरणीय ऊर्जा प्रणालीलाई विश्वसनीय तथा भरपर्दो बनाउन उन्नत ऊर्जा भण्डारण समाधानहरूको खोजी गरिरहेको छ । त्यस्तै, कम्पनीले फोहोरलाई ऊर्जामा परिवर्तन गर्ने कामसमेत गरिरहेको छ, जसले यसको नवीकरणीय ऊर्जा उत्पादनमा विविधता थपिरहेको छ ।
यस्ता परियोजनामार्फत सन् २०३२ सम्ममा ६० गिगावाट नवीकरणीय ऊर्जा क्षमता हासिल गर्ने कम्पनीको लक्ष्य छ। (भारतीय सञ्चारमाध्यमहको सहयोगमा)
