ऊर्जा खबर
काठमाडौं । अर्थमन्त्री डा. प्रकाशशरण महतले नेपालको नवीकरणीय ऊर्जा क्षेत्रमा लगानी बढाउन संयुक्त अधिराज्य बेलायत (युके) सरकारसँग आग्रह गरेका छन् । बेलायतको राजधानी लन्डनस्थित बेलायतको अर्थमन्त्रालयमा सोमबार भएको भेटवार्ताका क्रममा मन्त्री महतले बेलायतका ट्रेजरी लर्डस् मन्त्री बारोनेस पेनसँग यस्तो आग्रह गरेका हुन् ।
अर्थमन्त्री महतले बेलायत नेपाल विकासको एक प्रमुख साझेदार देश रहेको स्मरण गर्दै हरित ऊर्जामा दीर्घकालीन वित्तीय स्रोत उपलब्ध गराउन आग्रह गरे ।
उनले बेलायतको तर्फबाट जलवायु परिवर्तनको न्यूनीकरणका लागि गरिँदै आएको लगानी नेपालमा थप वृद्धि गर्नसमेत आग्रह गरेको मन्त्री महतको सचिवालयले जनाएको छ ।
जवाफमा मन्त्री पेनले नेपालको आर्थिक विकासमा बेलायतले सहयोग गर्दै आएको र यसलाई निरन्तरता दिने बताए । उनले ‘ग्रीन फाइनान्स’ क्षेत्रमा नेपाललाई सहयोग गर्ने प्रतिबद्धता व्यक्त गर्दै बेलायतको निजी क्षेत्रलाई नेपालको हरित ऊर्जाको क्षेत्रमा लगानी बढाउन प्रोत्साहन गर्ने बताए । भेटमा बेलायतका लागि नेपाली राजदूत ज्ञानचन्द्र आचार्य र नियोग उपप्रमुख रोशन खनालसमेत सहभागी थिए ।
लन्डनस्थित नेपाली राजदूतावासले गर्न लागेको लगानीसम्बन्धी उच्च्स्तरीय सम्मेलनमा भाग लिन लन्डन पुगेका मन्त्री महतले नेपाली राजदूतावासको आयोजना र डोल्मा फाउन्डेशनको सहकार्यमा सोमबार भएको नेपालको नवीकरणीय ऊर्जाको विकासमा दीर्घकालीन वित्तीय विकल्प विषयक अन्तक्रियामा समेत भाग लिएका थिए । उक्त सम्मेलनमा बोल्दै मन्त्री महतले नेपाल सरकारले विदेशी लगानी सुरक्षाको प्रत्याभूति गर्ने बताउँदै वैदेशिक लगानीकर्ताले लाभांश फिर्ता लैजाने प्रक्रियालाई सरल बनाउनेतर्फ नेपाल सरकार लागेको जानकारी दिए । उनले लगानीको वातावरण सुधार गर्न देशको कन्ट्री क्रेटिड रेटिङ्गको प्रक्रियासमेत सुरु भइसकेको पनि बताए ।
डोल्मा फाउन्डेशनका टीम गोचर र जापनिज बैंक एमयुएफजीका क्रिस्टोफर मार्कसले कर्पोरेट ग्रीन बन्डको बारेमा आफ्नो धारणा राखेका थिए ।
कार्यक्रममा स्टान्डर्ड चार्टर्ड बैंकका आदिल अन्सारीले सोभरियन बन्ड र नवनिर्वाचित लर्ड मेयर प्रो माइकल मेनिलीले पोलिसी पर्फमेन्स बन्डका बारेमा धारणा राखेका थिए । राजदूत आचार्यले लगानीका लागि नेपाल उर्वरभूमि रहेकाले लगानीकर्तालाई निर्धक्क भएर लगानी गर्न आग्रह गरेका छन् ।
