ऊर्जा खबर
काठमाडौं । विद्युत विकास विभागले देशकाे विभिन्न ठाउँमा पहिचान भएकाे करिब २६०० मेगावाट बराबरकाे जलविद्युत आयोजनाको अध्ययन पुरा गरेकाे छ । विभागले जलाशय, आंशिक जलाशय र नदी प्रवाही आयोजनाको अध्ययन सम्पन्न गरेकाे हाे ।
२५८५.६२ मेगावाटका बराबरकाे ३९ जलविद्युत आयाेजनाकाे अध्ययन पूरा गरेकाे विभागले जनाएकाे छ ।अध्यययन पुरा भएको आयोजनाहरूमध्ये ७४७.७४ मेगावाट ४ जलाशय र ५४३.७५ मेगावाट ३ आंशिक जलाशय छन् । विभागकाे तथ्यांकअनुसार १२९४.१३ मेगावाटका ३२ नदी प्रवाही आयोजनाकाे अध्ययन सकिएकाे छ ।
विभागमा अनुसार अध्ययन सकिएकाहरूमा २ देखि ४९० मेगावाटसम्मका आयोजनाहरू छन् । जसमा सबैभन्दा ठूलाे ४९०.२० मेगावाटको अरुण–४ जलविद्युत आयोजना हाे । याे नदी प्रवाही आयोजना हाे । अध्ययन पूरा भएका नदी प्रवाहीमा ५०.५३ मेगावाटको बेनी–कालीगण्डकी, ४.१० भेरी खोला, ४७ मेगावाटको दुधकोसी–४, ११० मेगावाटको दुधकोसी–५, ३० मेगावाटको इखुवा खोला, २० मेगावाटको तल्लो चमेलिया, ८.७४ मेगावाटको तल्लो चेपे खाेला छन् । १० मेवा खोला, १५.२ मेगावाटको म्याग्दी खोला, ८.६३ मेगावाटको रुपागाड, ४१.६ मेगावाटको संखुवा खोला, २५ मेगावाटको सिंगटी खोलालगायत आयोजनाहरूको अध्ययन पूरा सकिएकाे विभागकाे तथ्यांकमा उल्लेख छ ।
यसैगरी, अध्ययन पूरा भएको जलाशय आयोजनाहरूमा ६० मेगावाटको कन्काई मल्टीपरपोज, २८१.०४ मेगावाटको नौमुरे, ३०९ मेगावाटको सेती खोला–६ र ९७.७० मेगावाटको अप्पर झिमरूक रहेका छन् । साथै, आंशिक जलाशय आयोजनाहरूमा २० मेगावाटको बुढीगंगा, ४९.०५ मेगावाटको लोती कर्णाली र ४७४.२५ मेगावाटको तल्लो अरुण खोला अध्ययन पुरा भएको छ ।
