ऊर्जा खबर
काठमाडौँ । ऊर्जा, जलस्रोत तथा सिँचाइ मन्त्री शक्तिबहादुर बस्नेतले नेपाल हरित अर्थतन्त्र (ग्रिन इकोनोमी) मा जान ढिलो इसकेको बताएका छन् । उनले विश्वका धेरै देश हरित अर्थतन्त्रको विकासमा अघि बढिसकेको भन्दै नेपालले अब थप ढिलो गर्नु नहुने बताए । यसका लागि सरकारले नीति तथा कार्यक्रम बनाउँदा हरित अर्थतन्त्रीलाई प्राथमिकता दिनुपर्ने बताए ।
राजधानीमा बुधबार भएको 'हाइड्रो डायलग' कार्यक्रममा उनले यस्तो बताएका हुन् । उनले अब नेपालमा हरित अर्थतन्त्र र हरित आर्थिक विकासबारे बहस तथा छलफल गरी नीति बनाएर अघि बढ्नुको विकल्प नभएको बताए ।
उनले नेपालमा पर्याप्त स्रोत उपलब्ध रहे पनि सरकारले आर्थिक विकासमा स्रोतको व्यवस्थित सदुपयोग गर्न नसक्दा समृद्धिको चाहना पूरा गर्न नसकिएको बताए ।
नेपालसँग आफूसँग भएको जलस्रोतको भरपूर प्रयोग गर्नुभन्दा पनि पेट्रोलियमको आयातमा रमाइरहेको स्वीकार गरे ।
‘पेट्रोलियम पदार्थको आयात गरिरहेका छौ,’ उनले भने, ‘नेपालसँग भएका स्रोतहरुको प्रयोग भइरहेको छैन । जुन देशले आफूसँग भएका स्रोतको सही ढङ्गले अप्टिमम प्रयोग र सदुपयोग गर्न सक्दैन । त्यो देशमा समृद्धिको यात्रामा प्रभाव पर्छ । नेपाल जलस्रोतको धनी देश भनिरहेका छौँ ।’ मन्त्री बस्नेतले नेपाल ग्रिन अर्थतन्त्रमा जान आवश्यक नीति तथा कार्यक्रमहरु बनाउन ढिला गर्नुनहुने बताए ।
