ऊर्जा खबर
काठमाडौं । पछिल्लो समय निजी ऊर्जा उत्पादकहरूको आकर्षण सौर्य विद्युत उत्पादनतर्फ बढ्दै गएसँगै यसबाट उत्पादित विद्युत परिणाम पनि थपिँदै गएको छ । जलविद्युत आयोजना भन्दा कम लागत तथा छोटो समयमा निर्माण गर्न सकिने हुँदा उत्पादकहरूको आकर्षण सौर्य ऊर्जातर्फ बढ्दै गएको हो ।
पछिल्लाे समय साैर्य विद्युत उत्पादन गर्न अध्ययन तथा उत्पादन अनुमतिका लागि विद्युत विकास विभागमा अावेदन दिने ऊर्जा उत्पादकहरूको संख्या बढीरहेकाे छ । विभागका अनुसार हालसम्म १४१ मेगावाटका सौर्य आयोजनाले अध्ययन अनुमतिका लागि आवेदन दिएका छन् । उक्त क्षमताका ४ सौर्य आयोजनाले अध्ययन अनुमतिका लागि आवेदन दिएका हुन ।
अध्ययन अनुमतिका लागि आवेदन दिएका आयोजनामध्ये सबै भन्दा ठुलो १०० मेगावाटको नेपालगन्ज एसपिभी सौर्य पावर प्लान्ट आयोजना रहेको छ । जीटी इनर्जीले पहिचान गरेको उक्त आयोजनाले २०७९ चैत २६ गते अध्ययन अनुमतिका लागि आवेदन दिएको छ ।
यसैगरी, ३० मेगावाटको कपिलवस्तु सौर्य आयोजना र १० मेगावाटको लमही सौर्य आयोजना दुवैले २०८० साउन २४ गते अध्ययन अनुमतिका लागि विभागमा आवेदन दिएका छन् । यी दुई आयोजनाको अध्ययन प्राइम पावर प्रालिले गरेका छन् । त्यस्तै, १ मेगावाटको माल्टा सौर्य आयोजनाले २०७८ साउन ३२ गते अध्ययन अनुमतिका लागि आवेदन दिएको छ । यस आयोजनाको अध्ययन भने पशुपती इनर्जी डेभलपमेन्ट कम्पनी लिमिटेडले गरेको छ ।
यसैगरी, ९९.३६ मेगावाटको १४ सौर्य आयोजनाले भने उत्पादन अनुमति पाएर निर्माण प्रक्रिया अघि बढाएका छन् । उत्पादन अनुमति पाएका यी आयोजनाहरू निर्माणका विभिन्न चरणमा छन् । यस्तै, ७०५ मेगावाटका ४० आयोजनाले भने अध्ययन अनुमति पाइसकेका छन् । अनुमति पाएका यी आयोजनाहरू अहिले अध्ययनका विभिन्न चरणमा छन् ।
