दिलसा भण्डारी
काठमाडौँ । ताप्लेजुङ जिल्लामा निर्माणधीन २८.८ मेगावाटको माथिल्लो काबेली जलविद्युत् आयोजनाको ५० प्रतिशत निर्माण सम्पन्न भएको छ । आयोजनाका संरचनाहरू जिल्लाको सिरिजङ्गा गाँउपालिका–१, २, ४ र सिदिङ्वा गाँउपालिका–५ र ६ मा निर्माण भइरहेका छन् ।
अमेरिकामा रहेका गैरआवासीय नेपाली व्यवसायी तथा उद्यमीहरूको समूहले स्थापना गरेको टेस्ला हाइड्रोको ७८ प्रतिशत सेयर स्वामित्व पिस इनर्जीको नाममा रहेको छ । यी दुई कम्पनीले प्रत्यक्ष वैदेशिक लगानी (एफडिआई) ल्याएर आयोजना विकास गरिरहेका हुन् । आयोजना निर्माणका लागि कुल लागत ५ अर्ब ५४ करोड लाग्ने अनुमान गरिएको आयोजना प्रमुख प्रकाश ढुङ्गानाले ऊर्जा खबरसँग बताए । ।
संरचनाका कामहरू धमाधम भइरहेका र अबको डेढ वर्षमा विद्युत् उत्पादन गर्ने लक्ष्य रहेको उनले बताएका छन् । विद्युत्गृह, हेडरेस र इन्टेकको काम भइरहेको र अब डिसेन्डरको काम सुरु गर्ने उनले बताए । साथै सुरुङको काम ६० प्रतिशत सकिएको छ अब ४ महिनामा सुरुङको काम सम्पन हुने जानकारी दिएका छन् ।
आयोजनाले वार्षिक १६९.७४८ गिगावाट बिजुली उत्पादन गर्ने छ । उत्पादन हुने बिजुली विद्युत् पाँचथर जिल्लाको अमरपुर सबस्टेसनमा जोड्ने तयारी छ । उक्त सबस्टेसनसम्म बिजुली लैजान आवश्यक १४ किलोमिटर लामो १३२ केभी सिगल सर्किट प्रसारण लाइन कम्पनी आफैँले निर्माण गर्ने छ ।
आयोजनाले सामाजिक कार्य अन्तर्गत विद्यालयको भवन निर्माण, विद्यालयमा चमेनागृह, स्वास्थ क्षेत्रमा सहयोग, खानेपानी सेवा जस्ता क्षेत्रमा सहयोग गरेको जनाएको छ । साथै खोलामा मोटरबल पुल निर्माण गरेको आयोजनासम्म पुग्ने बाटो निर्माण गरेको छ । आयोजनाले युवालाई लक्षित गर्दै युथ क्लबहलाई सहयोग गर्दै आएको उनले बताएका छन् ।
