ऊर्जा खबर
सङ्खुवासभा । पूर्वी पहाडी जिल्ला सङ्खुवासभामा भारतीय कम्पनी सतलज जलविद्युत् निगम (एसजेभीएन) लिमिटेडले निर्माण गर्न लागेको ६६९ मेगावाटको तल्लो अरुण जलविद्युत् आयोजनाका कारण २६८ परिवार प्रत्यक्षरूपमा प्रभावित हुने भएका छन् । एससेभीएनले प्रस्ताव गरेको तल्लो अरुणको पुनर्वास तथा पुनःस्थापनाको मस्यौदा प्रतिवेदन अनुसार उक्त आयोजना निर्माणका लागि करिब ६५ हेक्टर जमिन अधिग्रहण गरिने छ ।
‘यसबाहेक वन क्षेत्र ७० हेक्टर र सरकारी जग्गा ६ हेक्टर अधिग्रहण हुनेछ’, तल्लो अरुण पावर डेभलपमेन्ट कम्पनीका प्रमुख कार्यकारी निर्देशक अरुण धिमानले भने । प्रभावित स्थानीयलाई करिब १ अर्ब ४० करोड रकम मुआब्जा वितरण गरिने आयोजनाले जनाएको छ । तल्लो अरुण बन्ने पक्का भएपछि प्रभावित क्षेत्रका बासिन्दासँग निर्माणकर्ता कम्पनीले छलफल अघि बढाएको छ ।
९०० मेगावाटको अरुण तेस्रो जलविद्युत् आयोजनाबाट विद्युत् उत्पादन भएपछि त्यसको टेलरेसबाट निस्केको पानीबाट खाँदबारी नगरपालिका–२ चेवाबेसीमा करिब १७.४ किलोमिटर सुरुङ मार्गबाट पानी ल्याएर तल्लो अरुणबाट विद्युत् उत्पादन गर्ने योजना छ । भारतीय कम्पनी एसजेभीएनले नै अहिले अरुण तेस्रो निर्माण गरिरहेको छ ।
