सागर केसी
दोलखा । जिरी नगरपालिका–९ बसेरीमा रहेको झाँक्रे खोला जलविद्युत केन्द्रको विद्युत्गृहमा पहिरोले क्षति पुर्याएको छ । वर्षासँगै आएको पहिरोले विद्युत्गृहसहित अन्य केही उपकरणमा क्षति पुर्याएको हो ।
माथिबाट पहिरो आउँदा ६३५ किलोवाटको उक्त जलविद्युत् केन्द्रको विद्युत्गृह भत्किएको र विद्युत् उत्पादन युनिटमा पुरेको आयोजनाको प्रवर्द्धक खिम्ती ग्रामीण विद्युत् सहकारी संस्थाका महाप्रबन्धक कुमार फुयाँलले जानकारी दिए ।
उनका अनुसार आइतबार दिउँसो आएको पहिरो स्काभेटर प्रयोग गरेर पन्छाइएको छ । खिम्ती–१ जलविद्युत केन्द्रले आयोजना प्रभावित दोलखा र रामेछापका बासिन्दालाई विद्युतीकरण गर्न ६३५ किलोवाटको झाँक्रे खोला साना जलविद्युत केन्द्र र ४०० किलोवाटको हलुवा खोला साना जलविद्युत् आयोजना निर्माण गरी उक्त सहकारीलाई हस्तान्तरण गरेको थियो ।
विद्युत् उत्पादन युनिटका उपकरणमा समस्या आएपछि गत फागुनदेखि उक्त जलविद्युत् केन्द्रको उत्पादन भने बन्द भएको थियो । विद्युत् उत्पादन बन्द भएकै बेला पहिरोले समेत विद्युत्गृहमा क्षति पुर्याएको हो ।
