ऊर्जा खबर
काठमाडौं । चालू आर्थिक वर्षको करिब ५ महिनामा साढे २९ मेगावाट विद्युत राष्ट्रिय प्रसारण प्रणालीमा जोडिएको छ । चालू आवको साउनदेखि मंसिर तेस्रो सातासम्ममा निजी क्षेत्रले निर्माण सम्पन्न गरी सञ्चालनमा ल्याएका ४ जलविद्युत र एउटा सौर्य गरी ५ आयोजनाको विद्युत प्रणालीमा जोडिएको हो ।
यो अवधिमा सिन्धुपाल्चोकमा निर्माण सम्पन्न भएको १ मेगावाटको हाँडिखोलाको विद्युत प्रणालीमा जोडिएको नेपाल विद्युत प्राधिकरण विद्युत व्यापार विभागले जनाएको छ । विभागका अनुसार हाँडिखोलाले भदौ १२ गतेदेखि विद्युत उत्पादन सुरु गरेको हो ।
यस्तै, खोटाङमा निर्माण सम्पन्न ३ मेगावाटको माथिल्लो रावाखोलाले पनि व्यापारिक विद्युत उत्पादन सुरु गरेको छ । यो आयोजनाको विद्युत गत असोज ४ गते प्रसारण प्रणालीमा जोडिएको हो ।
कास्कीस्थित १२ मेगावाटको नामार्जुन मादीले चालू आवबाट विद्युत उत्पादन सुरु गरेको छ । यो आयोजनाले गत असोज १२ गतेबाट व्यापारिक विद्युत उत्पादन सुरु गरेको विभागले जनाएको छ ।
यो वर्ष निजी क्षेत्रले निर्माण गरेको साढे ८ मेगावाटको बुटवल सौर्य विद्युत आयोजनाको विद्युत प्रणालीमा जोडिएको छ । यो नै निजी लगानीमा निर्माण भएको अहिलेसम्मकै ठूलो सौर्य विद्युत आयोजना हो । धेरैले यो भन्दा बढी क्षमताका आयोजनाको अनुमति लिए पनि निर्माण भएका छैनन् ।
बुटवल सौर्य विद्युतले गत कात्तिक १५ गतेबाट व्यापारिक विद्युत उत्पादन सुरु गरेको हो । व्यापारिक उत्पादन सुरु गर्नुअघि आयोजनाले १५ दिनसम्म परीक्षणको चरणमा प्राधिकरणलाई निशुल्क विद्युत दिएको थियो ।
दोलखामा निर्माण सम्पन्न भएको ५ मेगावाटको घट्टे खोला जलविद्युत आयोजनाको विद्युत पनि प्रसारण प्रणालीमा थपिएको छ । यो आयोजनाले गत कात्तिक २३ गतेबाट व्यापारिक विद्युत उत्पादन सुरु गरेको प्राधिकरणले जनाएको छ ।
चालू आवमा ४ सय ५६ मेगावाटको माथिल्लो तामाकोसीसहित १३ सय मेगावाट विद्युत प्रणालीमा थप्ने सरकारी लक्ष्य छ । तर, कोरोना (कोभिड–१९) महामारीका कारण जलविद्युत क्षेत्र पनि थलिएकाले लक्ष्य पूरा हुने सम्भावना कम देखिन्छ । चालू आवभित्र सम्पन्न गर्ने योजना रहेका आयोजना निर्माण सामाग्री अभाव, कामदार अभाव तथा भन्सारमा उपकरण अड्किएका कारण अघि बढ्न सकेका छैनन् ।
