ऊर्जा खबर
(खाँदबारी) संखुवासभा । ऊर्जा, जलस्रोत तथा सिँचाइ मन्त्री दीपक खड्काले बाँझो जमिनमा सिँचाइ सुविधा पुर्याउने र खाली जग्गामा सौर्य विद्युत् उत्पादनको योजना अगाडि बढाइने बताएका छन् । काेशी प्रदेशका विभिन्न क्षेत्रको अवलोकन भ्रमणमा रहेका उनले खाँदबारीमा आयोजित एक भेटघाट कार्यक्रमका क्रममा यस्तो बताएका हुन् ।
उनले जिल्लाका सबै पालिकाले अग्रिम सूचना पाउने गरी सूचना प्रणाली जडान गर्ने, बाँझो जमीनमा सिँचाइ सुविधा पुर्याउने, खाली जग्गमा सोलार प्रणाली जडान गर्नेलगायतका कामलाई समेत अगाडि बढाइने बताए । 'विद्युतको लाइसेन्स लिने तर काम नगर्नेको लाइसेन्स रद्द गरिने छ, काम गर्नेलाई प्रोत्साहन गरिने छ,' उनले भने, 'आगामी एक वर्षभित्र जिल्लाका सबै स्थानमा पूर्ण विद्युतीकरण भइसक्ने छ ।' माथिल्लो अरुणसहित अन्य जलविद्युत् आयाेजना समेत चाँडो अगाडि बढाउने गरी सरकारले काम गर्ने उनको भनाइ थियो ।
साेही क्रममा ऊर्जा, जलस्रोत तथा सिँचाइ सचिव गोपालप्रसाद सिग्देलले जिल्लाका ९० प्रतिशतभन्दा बढी स्थानमा विद्युतीकरण भएको र बाँकी स्थानमा चाँडै पूरा गरिने बताए ।
