एक दशकदेखि घिस्रिँदै आएको सिंगटी–लामोसाँघु प्रसारण लाइन पूरा हुँदै

काठमाडौं । निर्माण सुरु भएको झन्डै एक दशकदेखि कहिले बन्द त कहिले काम सुचारु हुँदै आएको सिंगटी–लामोसाँघु १३२ केभी डबल सर्किट प्रसारण लाइन अब अन्तिम चरणमा पुगेको छ । नेपाल विद्युत प्राधिकरणले २०६७ सालदेखि यो प्रसारण लाइनको निर्माण सुरु गरेको हो ।

काम सुरु भएलगत्तै स्थानीय अवरोध, जग्गा विवाद, सामान ढुवानीमा ढिलाई जस्ता समस्याले थलिँदै आएको थियो । काम अन्तिम चरणमा पुगेको हुँदा आगामी बैशाखभित्र सञ्चालनमा आउने आयोजना प्रमुख राजन ढुङ्गेलले बताए । उनका अनसार अबको एक महिनाभित्र सिंगल सर्किट लाइन सञ्चालन गरिनेछ ।

‘अहिलेसम्म सबै टावर उभ्याउनका लागि आवश्यक जग खनिसकिएको छ, ‘दोलखामा एक र सिन्धुपाल्चोकमा ४ वटा टावर खडा गर्न बाँकी छ,’ उनले ऊर्जा खबरसँग भने, बाँकी टावरको २ ठाउँमा काम भइरहेको छ । निर्माणस्थलमा सामान ढुवानीको काम पनि पूरा भइसकेको छ ।’

आयोजनाका अनुसार ४० किलोमिटर दूरीमा निर्मित टावरमा ३४ किलोमिटर सिंगल सर्किट तार तान्ने काम सकिएको छ । दोलखामा ७३ देखि ७६ नम्बर टावरसम्म तार तान्न अझै समस्या छ ।

समस्या समाधान गर्न जिल्ला प्रशासन कार्यालय दोलखा र स्थानीयसँग सम्झौता गरी बैशाखभित्र पूरा गरिने ढुंगेलले दोहोर्याए । चैत दोस्रो सातामा नै लाइन पूरा गर्ने लक्ष्य रहे पनि स्थानीय अवरोधले ढिला भएको प्राधिकरणले बताउँदै आएको छ ।

सुरुमा २ वर्षभित्रै प्रसारण लाइनको निर्माण पूरा गर्ने गरी ठेक्का सम्झौता भएको थियो । तर, १० वर्ष बितिसक्दा पनि काम पूरा हुन सकेको छैन । समयमा काम नसकेपछि ठेकेदारको ४ पटकसम्म म्याद थपिएको छ ।

चौथो पटक थपिएको म्यादअनुसार २०७५ जेठमा निर्माण पूरा हुनुपर्ने थियो । तर, त्यसपछि ३ वर्ष सकिन लाग्दा समेत काम टुंगिएको छैन । पछिल्लो समय निजी क्षेत्र अर्थात् सिंगटी इनर्जी प्रालिको दबाब तथा समन्वयका कारण पनि काम अन्तिम चरणमा पुगेको छ ।

प्रसारण लाइनको काम समयमा सम्पन्न नहुँदा २५ मेगावाटको सिंगटी खोलाको बिजुली खेर गइरहेको छ । यही कारण प्रवर्द्धकले अहिलेसम्म करिब ६० करोड रुपैयाँ आम्दानी गुमाएको दाबी गरेको छ ।

यसैगरी, यही लाइनमा जोडिने ३० मेगावाटको खानी खोला, ११ मेगावाटको तल्लो खारे लगायत आयोजना पनि अन्तिम चरणमा पुगेका छन् । प्रसारण लाइन निर्माणमा ढिलाई हुँदा निजी क्षेत्रद्वारा निर्मित आयोजनाको विद्युत् उत्पादनको समय पनि सारिएको छ ।