बाराही हाइड्रोले ७ लाख कित्ता साधारण सेयर निष्कासनका लागि स्वीकृति पायो

काठमाडौं । बागलुङको कुस्मीशेरामा १.५ मेगावाटको ठेउले खोला जलविद्युत आयोजना निर्माण गरी सञ्चालनमा ल्याएको बाराही हाइड्रो पावर पब्लिक लिमिटेडले ७ लाख कित्ता साधारण सेयर निष्कासनको स्वीकृति पाएको छ । स्थानीयबासी र सर्वसाधारणका लागि सेयर निष्कासनका लागि नेपाल धितोपत्र बोर्ड (सेबोन) ले आइतबार (असोज २३ गते) स्वीकृति दिएको हो ।

कम्पनीका अनुसार स्वीकृत प्राप्त १०० रुपैयाँ मूल्य अंकित उक्त परिमाणको सेयर संख्या मध्ये २ लाख ५० हजार कित्ता आयोजना प्रभावित क्षेत्रका बासिन्दाहरूलाई र ४ लाख ५० हजार कित्ता सर्वसाधारणका लागि निष्कासन तथा बाँडफाँड हुनेछ । सेयर निष्कासन तथा बिक्री प्रबन्धकमा यसअघि नै एनआइबिएल एस क्यापिटल लिमिटेड नियुक्त भइसकेको छ ।

२०७५ असार २४ गतेदेखि विद्युत उत्पादन भइरहेको आयोजनाको विद्युत् ७.५ किलोमिटर दूरीमा रहेको ३३ केभी कुस्मा सबस्टेसनमा जोडिएको छ । प्राधिकरणले उत्पादित विद्युतको हिउँदमा प्रतियुनिट ७.४२ रुपैयाँ र बर्खामा ४.२४ रुपैयाँ तिरिरहेको छ भने वार्षिक ऊर्जा औसत ८.२१७ गिगावाट घन्टा उत्पादन भइरहेको छ ।