ऊर्जा खबर
काठमाडौं । अर्थमन्त्री डा.प्रकाशशरण महतले दूधकोसी जलाशययुक्त जलविद्युत परियोजनामा लगानी प्रक्रिया अगाडि बढाउन एशियाली विकास बैंक (एडिबी) लाई आग्रह गरेका छन् । खोटाङको रावाबेँसी गाउँपालिका-३ लामीडाँडा र ओखलढुंगाको चिसंखुगढी गाउँपालिका-६, भदौरेको सिमानामा बन्ने नदीमा निर्माण गर्न लागिएकाे आयाेजनाकाे लगानी प्रक्रिया अगाडि बढाउन आग्रह गरेका हुन् ।
सुक्खायाममा भारतबाट बिजुली आयात गर्नुपरेको उल्लेख गर्दै महतले नेपाललाई धेरै जलाशययुक्त योजनाहरू आवश्यक रहेको बताए । उनले नेपालमा पेट्रोलियम पदार्थको उपभोग घटाउने क्रममा रहेको भन्दै यहाँ जलविद्युतको प्रचुर संभावनाको सदुपयोग गर्नुपर्ने बताए ।
प्रधानमन्त्री पुष्पकमल दाहालको हालै भारत भ्रमणको क्रममा भारतले नेपालबाट १० हजार मेगावाट विद्युत खरिद गर्ने भएको । ‘हामी आन्तरिक बजार बढाउँदै पेट्रोलियम पदार्थको खपत घटाउने प्रक्रियामा छौं, यसका लागि हामीलाई धेरै भण्डारण परियोजनाहरू चाहिन्छ’ महतले भने ।
सरकारले आगामी आर्थिक वर्ष २०८०/८१ भित्र आयोजनाको मोडालिटी तय गरी निर्माण प्रक्रिया अघि बढाउने घोषणा गरेको छ ।
