ऊर्जा खबर
काठमाडौं । मिडिल मोदी हाइड्रो पावर कम्पनीले पर्वतमा निर्माण सम्पन्न गरेको १८ मेगावाटको मध्यमोदी जलविद्युत आयोजनाको परीक्षण सुरु भएको छ । आयोजनाको सिभिल संरचना, उपकरण जडानको काम पुरा गरी उत्पादन परीक्षणको काम सुरु गरिएको हो ।
आयोजनाको सम्पूर्ण काम पूरा गरेर उत्पादन परीक्षण सुरु गर्न सोमबार (मंसिर १९ गते) देखि नै तयारी थालेकाे कम्पनीले जनाएको छ । २०७१ मंसिरदेखि निर्माण सुरु भएको आयोजनाको काम ८ वर्षमा सम्पन्न गरी परीक्षण सुरु गरिएको हो ।
नेपाल विद्युत प्राधिकरणको टोलीले परीक्षण उत्पादन र प्रसारण लाइनमा जडान गर्ने कार्यको अध्ययन गरिरहेको आयोजना प्रमुख प्रताव खरेलले बताए । ‘निर्माण थालेको तीन वर्षमा नै काम पूरा गर्ने लक्ष्य राखिए पनि भूकम्प, नाकाबन्दी र कोभिड–१९ को असरका कारण आयोजना पाँच वर्षपछि धकेलिएको हो’, उनले भने, ‘परीक्षण उत्पादन सुरु गरेपछि उत्पादित विद्युत १३२ केभी क्षमताको मोदी–लेखनाथ सबस्टेसनमा जडान गर्ने तयारी भइरहेको छ ।’
२ सातासम्मको परीक्षणपछि मात्र केन्द्रीय प्रसारण लाइनमा जोडिने भएको छ । आयोजनाको ड्याम, टनेल, पावर हाउस, टावर निर्माणलाई आयोजनाका प्रमुख र जटिल कामका रूपमा लिने गरिन्छ ती सबै काम पूरा भएका छन् ।
आयोजनाको काम करिब ४ अर्ब रुपैयाँ लागतमा सम्पन्न भएको छ । सुरुवातमा २ अर्ब ८० करोड रुपैयाँ लागत लाग्ने अनुमान गरिएको थियो ।आयोजनाको काम यसअघि नै सम्पन्न गर्ने लक्ष्य भएपनि आयोजना प्रभावित स्थानीयले पटक–पटक आन्दोलन र विरोध तथा प्राकृतिक विपदका कारण लम्बिएको खरेलले बताए । भूकम्प, बाढी र पहिरा, कारोना महामारीले गर्दा आयोजनाको उत्पादन तालिका प्रभावित भएको हो । सुरुवातमा १५.१ मेगावाट क्षमतामा निर्माण गर्ने भनिएपनि पछि क्षमता विस्तार गरेर १८ मेगावाटमा सम्पन्न गरिएको हो ।
