ऊर्जा खबर
.jpg)
काठमाडौं । सुपर माई हाइड्रो पावर कम्पनीले चालू आर्थिक वर्षको ६ महिनामा साढे ७ करोड रुपैयाँ मुनाफा आर्जन गरेको छ । कम्पनीले इलाममा सञ्चालित ७.८ मेगावाटको सुपर माई जलविद्युत आयोजनाको विद्युत बिक्रीबाट यो मुनाफा आर्जन गरेको हो ।
कम्पनीले साउनदेखि पुससम्मको अवधिमा विद्युत बिक्रीबाट १४ करोड ८७ लाख रुपैयाँ आम्दानी गरेको छ । कम्पनीको सबै खर्च कटाउँदा कूल आम्दानीको ५० प्रतिशत मुनाफा आर्जन हुन गएको हो ।
कम्पनीले प्रवद्र्धन गरेको आयोजनाले नेपाल विद्युत प्राधिकरणसँगको सम्झौताको ९९ प्रतिशत ऊर्जा उत्पादन गरी प्रसारण प्रणालीमा योगदान गरेको छ । कम्पनीले आर्थिक वर्ष २०७६/७७ र २०७७/७८ मा क्रमशः ४ करोड ५८ लाख रुपैयाँ र ४ करोड ६३ लाख रुपैयाँ मुनाफा आर्जन गर्न सफल भएको थियो ।
कम्पनीले यी दुई आर्थिक वर्षमा आर्जन गरेको मुनाफाबाट संस्थापक सेयरधनीलाई क्रमशः ७.१५ प्रतिशत र ११.५ लाभांश वितरण गरेको थियो । कम्पनीले आयोजना प्रभावित क्षेत्रका स्थानीय र सर्वसाधारणका लागि पनि साधारण सेयर निष्कासन गर्दैछ । कम्पनीले प्रतिकित्ता सय रुपैयाँ अंकित १० करोड रुपैयाँ बराबरको १० लाख कित्ता सेयर निष्कासन गर्न नेपाल धितोपत्र बोर्डमा आवेदन दिएको छ ।
बोर्डको अनुमतिपछि पहिलो चरणमा आयोजना प्रभावित क्षेत्रका स्थानीय र दोस्रो चरणमा सर्वसाधारणका लागि सेयर निष्कासन गरिने कम्पनीले जनाएको छ । कम्पनीको सेयर निष्कासन गरी बाँडफाँड गर्न सानिमा क्यापिटललाई बिक्री प्रबन्धक नियुक्त गरेको छ । सुपर माई लक्ष्यभन्दा अगाडि निर्माण सम्पन्न भई प्रसारण प्रणालीमा जोडिएको थियो ।
सुपर माईमा लगानी गरेको समूहले इलाममा नै सुपर माई ‘ए’ र सुपर माई क्यासकेड आयोजना निर्माण गरी सञ्चालन गरिरहेको छ । लमजुङमा निर्माणाधीन चेपे खोला पनि अन्तिम चरणमा पुगेको छ ।
