ऊर्जा खबर
काठमाडौं । नेपाल स्टक एक्सचेन्ज (नेप्से) ले खानीखोला हाइड्रोपावर कम्पनीको सेयर कारोबार रोक्का गरेको छ । लगानीकर्ताको उजुरीपछि नेप्सेले लामो समयदेखि वित्तीय विवरण सार्वजनिक नगरेको भन्दै दोस्रो बजारमा कम्पनीको कारोबार रोक्का गरेको हो ।
नेप्सेले धितोपत्र सूचीकरण विनियमावली २०७५ को विनियम २२ ‘१’ क मा भएको व्यवस्था बमोजिम कम्पनीले वित्तीय विवरण पेस नगरेकोले सेयर कारोबार रोक्का गरेको जनाएको छ । धितोपत्र सूचिकरण विनियमावली २०७५ को विनिमय १६ ‘१’ घ मा भएको व्यवस्था बमोजिम जेठ २० गते (बिहीबार) देखि कम्पनीको कारोबार रोक्का गरिएको छ ।
खानीखोलाले २०७६ पुस यता कुनै वित्तीय विवरण सार्वजनिक गरेको छैन । उसले २०७६ सालमा सार्वजनिक गरेको त्रैमासिक वित्तीय विवरणअनुसार कम्पनीको नेटवर्थ ७ रुपैयाँ ऋणात्मक थियो । त्यसयता अहिलेसम्म लगातारको घाटाका कारण कम्पनीको नेटवर्थ ५० रुपैयाँ बढी ऋणत्मक भइसकेकाले कारोबार रोक्न माग गर्दै लगानीकर्ता केशब कोइराला ‘काका’ ले नेप्सेमा उजुरी दिएका थिए ।
खानी खोलाले ४.३६ मेगावाटको टुंगुन/ठोस्ने र २ मेगावाटको खानी खोलाबाट विद्युत उत्पादन गरिरहेको छ । प्रसारण लाइन समस्याले लामो समय पूर्ण क्षमतामा चल्न नपाउँदा खानीखोला घाटामा गएको हो । प्रसारण लाइन समस्याकै कारण खानीखोलाले विद्युत बिक्रीबाट हुने ४० करोड रुपैयाँ बराबरको आम्दानी गुमाएको थियो । यही कारण पनि उसको वित्तीय विवरण ऋणात्मक देखिन पुगेको हो । अहिले कम्पनीले सञ्चालन गरेको जलविद्युतगृह पूर्ण क्षमतामा चल्न थालिसकेको छ ।
खानीखोलासँगै घलेम्दी, जोशी र हिमाल दोलखा हाइड्रोपावर कम्पनीको सेयर कारोबार पनि रोक्का गर्न उजुरी परेको थियो । तर, खानीखोलाबाहेकका अन्य कम्पनीको कारोबार भने रोकिएको छैन । कोइरालाले चलखेल गरी नियमितरूपमा वित्तीय विवरण सार्वजनिक नगर्ने घाटामा गएका कम्पनीको सेयरको मूल्य बढाएर सोझा लगानीकर्तालाई फसाउन खोजिएको भन्दै आवाज उठाउँदै आएका छन् ।
याे पनि पढ्नुहाेस
जलविद्युतमा माफियागिरी, १७ कम्पनीले आजसम्म न लाभांश दिए न बोनस सेयर
जलविद्युत् कम्पनीले बदमासी गरेपछि लगानीकर्ता धितोपत्रमा, ३ कम्पनीको कारोबार रोक्न उजुरी
