ऊर्जा खबर
काठमाडौं । कम्पनीको वित्तीय विवरण सार्वजनिक नगरी लगानीकर्तालाई अन्योलमा राखेको भन्दै ३ जलविद्युत् कम्पनीको सेयर कारोबार रोक्का गर्न नेपाल धितोपत्र बोर्डमा उजुरी परेको छ ।
लगानीकर्ता केशव कोइरालाले खानीखोला, जोशी हाइड्रो पावर र हिमाल दोलखा पावर कम्पनीकोे सेयर कारोबार रोक्का गर्न माग गर्दै मंगलबार उजुरी दिएका हुन् ।
कम्पनीहरूले आफ्नो वित्तीय विवरण प्रकाशित नगरी दोस्रो बजारमा कारोबार गरिरहँदा लगानीकर्ता अन्योलमा परेको उजुरीमा छ । खानीखोलाले २०७६ पुस यता कुनै विवरण सार्वजनिक गरेको छैन् । उसले २०७६ सालमा सार्वजनिक गरेको त्रैमासिक वित्तीय विवरणअनुसार कम्पनीको नेटवर्थ ७ रुपैयाँ नकारात्मक रहेको र हालसम्म लगातार घाटाले कम्पनीको नेटवर्थ ५० रुपैयाँ बढी नकारात्कम भइसकेको कोइरालाले उल्लेख गरेका छन् ।
याे पनि पढ्नुहाेस् : जलविद्युत् सेयरमा माफियागिरी, लगानीकर्ता होशियार !
यसैगरी, जोशी र हिमाल दोलखाले पनि आमलगानीकर्ताले जानकारी पाउने गरी कुनै विवरण सार्वजनिक नगरेकाले दोस्रो बजारको कारोबार रोक्का गर्न आवेदन दिइएको छ । टाट पल्टिसकेका कम्पनीको सेयर महँगो मूल्यमा कारोबार हुँदा आमलगानीकर्ता डुब्ने खतरा देखिएको कोइरालाले उल्लेख गरेका छन् ।
नेपाल स्टक एक्सचेञ्च (नेप्से) मा सूचीकृत अधिकांश हाइड्रो पावर कम्पनीका सञ्चालकले धमाधम राजीनामा गरी आफ्नो सेयर बेच्न थालेकाले संस्थापकलाई सेयर बेच्नबाट रोक्न पनि अनुरोध गरिएको छ ।
मंगलबार कारोबार बन्द हुँदा हिमाल दोलखाको प्रतिसेयर मूल्य २४५ रुपैयाँ, जोशी हाइड्रोको २५३ रुपैयाँमा र खानी खोलाको २५० रुपैयाँ थियो । खानी खोलाले ४.३६ मेगावाटको टुंगुन/ठोस्ने र २ मेगावाटको खानी खोलाबाट विद्युत उत्पादन गरिरहेको छ । जोशीको ३ मेगावाटको माथिल्लो पुवा–१ र हिमाल दोलखाको ४.५ मेगावाटको माई खोला र ८ मेगावाटको माइ क्यासकेड सञ्चालनमा छन् ।
.jpg)
