ऊर्जा खबर
काठमाडाैं । एनएमबी बैंक लिमिटेड र वैकल्पिक ऊर्जा प्रवर्द्धन केन्द्र अन्तर्गतको केन्द्रीय नवीकरणीय ऊर्जा कोषबीच मधेस प्रदेश, लुम्बिनी प्रदेश र कर्णाली प्रदेशमा नवीकरणीय ऊर्जाका क्षेत्रमा लगानी प्रवर्द्धन गर्न दिगो ऊर्जा चुनौती कोष कार्यक्रम अन्तर्गत कर्जा नोक्सानी सुरक्षण सम्बन्धी सम्झौतापत्रमा हस्ताक्षर भएको छ ।
यो कोष बेलायत सरकारको अनुदानमा ‘नेपाल नवीकरणीय ऊर्जा कार्यक्रम’को सहयोगमा स्थापना भएको हो । सम्झौताको विशेषता बैंकले उल्लेखित प्रदेशहरूमा नवीकरणीय ऊर्जाका परियोजनामा गरेको कर्जा लगानीको भुक्तानी नभएमा त्यस्ता कर्जामा कोषले २० प्रतिशत साँवा रकमसम्मको सुरक्षण प्रदान गर्नेछ । यसले एनएमबिलाई नवीकरणीय ऊर्जा क्षेत्रमा लगानी विस्तार गर्नका लागि सहयोग पुग्नेछ ।
एनएमबीले दीगो बैंकिङमार्फत देशमा वास्तविक अर्थतन्त्रको प्रवर्द्धन गर्न साना तथा मझौला, कृषि, पूर्वाधार र ऊर्जा क्षेत्रलाई प्राथमिकतामा राखि कार्य गर्दै आएको छ । बैंकले स्वच्छ ऊर्जाको प्रवद्र्धन र नेपालको ऊर्जा पूर्वाधार र आपूर्ति प्रणालीलाई अझ दीगो तरीकाले रूपान्तरण गर्ने, स्वच्छ र नवीकरणीय ऊर्जाको उपयोग गर्ने र भारतबाट बिजुली र जीवाषेश इन्धन आयातमा रहेको ठूलो परनिर्भरता घटाउने सरकारको पहललाई समेत सहयोग पुर्याउँदै आएको छ ।
बैंकले अन्तर्राष्ट्रिय मान्यता प्राप्त हरित कर्जा लगानी सिद्धान्तहरूको आधारमा आफ्नो हरित लगानी कार्यविधी र वातावरणीय एवं सामाजिक व्यवस्थापन प्रणालीको विकास गरेको छ । जसमा, अन्तर्राष्ट्रिय वित्त निगमले वातावरणीय एवं सामाजिक जोखिमको क्षेत्रमा निर्देशित गरेका मापदण्डहरू र अन्तर्राष्ट्रिय अभ्यासहरू समेत समेटिएका छन् ।
एनएमबी नवीकरणीय ऊर्जा क्षेत्रमा प्राथमिकताका साथ लगानी गर्ने नेपालको अग्रणी बैंक हो । यो साझेदारीले देशमा नवीकरणीय ऊर्जाको लगानीलाई विस्तार गर्नका लागि सहयोग प्रदान गर्नेछ । यसले नवीकरणीय ऊर्जा क्षेत्रलाई मुल प्रवाहमा ल्याई ऊर्जा र वित्तीय सेवामा पहुँच नपुगेको जनसंख्यामा नवीकरणीय ऊर्जाको प्रवद्र्धन गर्न सकिने बैंकका प्रमुख कार्यकारी अधिकृत सुनिल केसीले बताए । ‘यसमा प्रोत्साहित गर्नुको साथै यो सम्झौतापछि बैंकको हरित कर्जा अझ बढी लक्षित वर्गमा पुग्ने विश्वास लिइएको छ,’ उनले भने ।
बैंकले जनवरी २०१८ देखि नै केन्द्रीय नवीकरणीय ऊर्जा कोषका लागि ह्यान्डलिंग बैंकको भूमिकामा समेत कार्य गर्दै आइरहेकोे छ । साथै, देशैभरी रहेका २०१ शाखाहरू, १३८ एटिएमहरू, ११ एक्सटेन्सन काउन्टरहरू मार्फत अत्याधुनिक एवं उच्चस्तरीय बैंकिङ सेवाहरू प्रदान गदै आएको छ ।
