ऊर्जा खबर
काठमाडाैं । नेपाल विद्युत प्राधिकरणले बुढानिलकण्ठ सबस्टेसनको चुनिखेल फिडरको विद्युत लाइन काटेको छ । प्राधिकरणले बुढानिलकण्ठ–८ स्थित कागज कारखाना क्षेत्रमा सडक विस्तार भएको स्थानको हाई टेन्सन लाइन सार्न ९ घन्टाका लागि विद्युत लाइन काटिएको हो ।
बिहान ८ बजेदेखि फिडरको लाइन काटिएको छ । विद्युत लाइन काटिँदा उक्त फिडरबाट विद्युत वितरण हुने बुढानिलकण्ठ–८, ओमनगरलगायत स्थानको सेवा प्रभावित भएको छ । अवरुद्ध विद्युत सेवा साँझ ५ बजेबाट सुचारु हुने प्राधिकरणले जनाएको छ ।
यस्तै, प्राधिकरण पोखरा वितरण केन्द्रले हेर्ने फेवा फिडरको सेवा पनि अवरुद्ध भएको छ । यो फिडरको कृस्ति, दोपहरे, निर्मल पोखरी, भरत पोखरीलगायत स्थानमा बुस कटिङ गर्न विद्युत सेवा अवरुद्ध गरिएको हो ।
बिहान १० बजेबाट अवरुद्ध सेवा साँझ ५ बजेबाट सुचारु हुने वितरण केन्द्रले जनाएको छ । प्राधिकरणले लोडसेडिङ अन्त्यपछि वितरण लाइन सुधार, सबस्टेसनको मर्मत तथा स्तरोन्नतिलगायत कार्यका लागि ग्राहकलाई अग्रिम सूचना दिएर लाइन काट्ने गरेको छ ।
